Huaisen takin Murray a chak

Andy Murray hi lo la theihnghilh bik suh aw, hun rei tak chhung hliamin tibuai mah se US Open 2020-ah match ropui a khel leh thei ta. Britain tlangval hian set hnih a hloh hmasak hnuah Yoshihito Nishioka hneh letin second round a lut.

Thawhlehni zan Flushing Meadows, New York-a inkhelah kum 33 mi Murray hian Japanese player hi darkar li leh minute 39 chhungin 4-6, 4-6, 7-6 (7-5), 7-6 (7-4), 6-4 in a hneh - kumin US Open khelh laiah chuan match rei ber a la ni hial.

Arthur Ashe Stadium chhungah fans an awm thei lo a, tennis ngaina tak Britain ho chuan an fa chuam inkhel hi TV aṭanga an en a ngai. 2019 Australian Open hnua a Grand Slam khelh lehna hmasa berah Murray-a’n bul a ṭan fuh lo.

Set hmasa pahnihah Murray-a’n double fault vawi nga leh unforced errors vawi 30 ngawt a nei, set khat pawh la loin a tlawm dawn niin a lang hman. Mahse set thumna aṭangin ropui takin a khel chhuak, mipui au phurtu nei lo mah se ring taka aw rawl chhuah meuhin a rilru paukhauhzia a lantir.

BBC radio lama commentator David Law chuan, “Andy Murray kha Andy Murray pawh a ang lo,” a ti. Khel bawr na vangin a inkhel mumal lo rei tawh, tunah erawh huaisen takin a natna hnehin a inkhel leh thei ta - tennis chawlhsan tura ngaih tawh kha darkar li chuang a inkhel thei leh tawh!

Tun hnai season thum chhung chu Andy Murray hi hliam vangin a buai, a bik takin a khel bawr na chu zai a ngai. A khel bawr ruh zai a ni a, a ruh inchuktuahna laiah thir phum a ngai hial - hetianga enkawl ngai tawh tennis player zingah chuan singles match khel leh thei awmchhun a ni hial.

World number 1 hlui Murray chuan, “Ka chau, ka taksa hi a na ṭhem ṭhum vekin ka hria, a bik takin ka kephah a kham hle. Hun rei tak chhung chu match khat bik rei tak khelh ang kha ka nei tawh ngai lo, set hnih hloh hnuah thawh chhuah leh kha chu huphurhawm tak a ni.

“Amaherawhchu engtik lai mahin a chak lo leh tlawm zawk nih hi ka duh ngai lo, ka theihna zawng zawng sawm khawmin ka bei let. Locker room-ah khan vura inchiahna ‘ice bath’ an dah, mahse chu chu rikrum thil atan a ni. Kei chuan inkhelh zawh ve leh kha thil kha ka mamawh,” a ti.

Season hmasa final-ah Daniil Medvedev-a’n Rafael Nadal hneh loin pahnihna a ni. Final an khelhna Arthur Ashe Ashe Stadium-ah Russian player hi a kir leh a, tun ṭumah erawh first round khelin Federico Delbonis chu 2, 6-1, 6-2, 6-4 in a hneh.

Seeded pathumna Medvedev chuan, “Grand Slam-ah chuan inelna a rei a, round hmasa lama set hloh lo a chak theih hi chu duhthusam a ni,” a ti. World number 79 laka hnehna chang turin darkar khat leh minute 46 chauh a hmang, tha a khek thei tihna a ni.

Nikum khan Medvedev-a’n hard court inelna a hmang ṭha hle. Washington, Montreal, Cincinnati leh US Open-ah te final a lut vek, kuminah erawh inkhel a awm mumal lo. Kar hmasa khan Cincinnati Masters-ah hian quarterfinal paltlang zo loin a tla.