Wales-ah Bale a hlim

Wales-in zanin dar 12:15 hian Helsinki Olympic Stadium-ah Finland an hmachhawn dawn. Real Madrid manager Zinedine Zidane nena inhmu thiam lo Gareth Bale-a'n Wales tan hmun pawimawh a chang ang. .

Real Madrid-in La Liga an champion-na kawngah Bale hian tha thawh hlawk mah se chanchin erawh a nghah hle. Tottenham Hotspur forward hlui hian bench-ah a kut hmanga en tlang lem siamin inkhel a en a, face mask hmanga a mit tuamin a lo mu a, nomawi an chawi lai pawhin a hmel aṭangin a hlim tak tak lo tih a lang bawk.

Season tawp lama Bale-a chetdanin sawisel a hlawh a, chutihrualin Wales-in nikum November thlaa European Championship khel tura an inpettlin khan Bale hian a club khelhna hi a ti el daih tawh. 

Wales-in Hungary 2-0 a an hneh zawhah Bale hian 'Ka ngaih pawimawh dan indawt - Wales, Golf leh Madrid' tih banner chu khelmualah a pawh parh daih tawh.

Season liam ta khan Bale hian match 20 chauh a khel chungin hlawh tam tak petu Real Madrid tan khelh zel a tum a, a theihna tak tak chhawrtu erawh Wales chauh an ni rih. Wales coach Ryan Giggs chuan Bale leh Zidane-a buainaah a inrawlh loh thu a sawi.

Manchester United legend Giggs chuan, "Zidane nen kan inbe lo. French leh Spanish ka thiam tawk lo a, ka tawnhriat aṭangin Zidane hian English a thiam tawk lo tih ka hre bawk," tiin a sawi.

Wales training-naah Bale-a hlim hmel hmuh tur a awm leh ta a, chutihrualin player pawimawh dang Aaron Ramsey, Ashley Williams, David Brooks leh Tyler Brooks te chu hliam vangin an inlan thei dawn lo.