Jazz hnehin Nuggets an tlang

Utah Jazz tan NBA playoff chu a tawp ta, nimin zing khan game 7 khelh niin Denver Nuggets chuan 80-78 a hnehna changin series 4-3 in an la a, conference semifinal-ah chuan Los Angeles Clippers nen an inhmachhawn leh ang.

Nuggets hian game hmasa pali zinga pathum lain series-ah 3-1 in hma an hruai fal hman, nuamsa taka tlang tur angin lang mah se a zawna game an hloh avangin 3-3 chiah a ni; game 7 hmanga chinfel a nihnaah pawh point hnih chauhin hnehna an chang hram.

Game 7-ah hian team pahnih an fimkhur takzet a, nidang angin basket pawh kan hmu hnem lo. Hnehna an chan theih nan hian point 30 neitu Nikola Jokic a langsar fal a, a teammate zinga amah hnaihtu Jamal Murray chuan point 17 chauh a nei phak.

Nimin zing khan Boston Celtics leh Toronto Raptors te chuan conference semifinal game 2 an lo khel ve thung. Celtics hian 102-99 a hnehna changin series-ah 2-0 in hma an hruai a, final-a tlang turin an dinhmun an sawhnghet zel.