East Bengal-in ISL khel dawn

West Bengal chief minister Mamata Banerjee chuan East Bengal-in season tharah Indian Super League an khelh tur thu a sawi a, East Bengal lam aṭanga official taka puan zarna erawh a la awm lo thung. 

Mamata chuan, "Buaina chinfel a ni ta. East Bengal chuan season tharah ISL an khel ang," tiin nimin tlai khan a sawi a, Kolkata club-ah hian Shree Cement chuan 80% share an lei dawn niin an sawi. 

West Bengal Chief Minister hian Kolkata club lianin ISL an zawm tur thu sawi mah se chinfel ngai erawh a la awm nual dawn - ISL lam hian official-in league khel duh zawnna an tichhuak leh phawt dawn a ni. 

Reliance official Tarun Jhunjunwala chuan, "Didi (Mamata sawina) puihna tel lo chuan tun dinhmun hi kan thleng zo kher lo ang. East Bengal tan tun hi bung thar a ni a, tun season-a ISL an khelh ngei theih nan theihtawp kan chhuah ang," a ti a, Didi sawi ang hian a thleng ngei dawn niin a lang. 

East Bengal hotute zinga mi  Debabrata Sarkar  chuan, "Tunah chuan ISL hnenah dilna kan la thlen chauh ang. September 1 khan inbiakna kan nei tawh a, buaina tlem awm mah se Didi hian kan buaina zawng zawng min chinfel sak vek a ni," tiin a sawi. 

Tun season ISL hi Covid-19 vangin hmun khatah khelh a ni dawn a, Goa-in an thleng dawn - stadium pathum Jawaharlal Nehru Stadium (Fatorda), GMC Athletic Stadium (Bambolim) leh Tilak Maidan Stadium (Vasco) ten inelna hi an thleng ang.