Arsenal defender thar Gabriel Magalhaes

Mikel Arteta-a’n team chak lohna lai nia a hriat a thuam ṭha zel. Arsenal chuan Lille aṭangin Gabriel Magalhaes chu pound maktaduai 27 sengin an lalut, Brazilian defender hian North London club tan season nga daih contract a ziak.

Kum 22 mi Gabriel hian Gunners zawm turin August 24 khan London khawpui a thleng tawh, mahse Britain sorkar kalphung angin ram dang aṭanga zin lut chu khung hran hmasak an ni a, Thawhlehni zan khan pho chhuah a ni chiah.

Nipui bazar chhungin Arteta-a’n Willian chu free transfer-in a lalut tawh a, defender William Saliba an laklet bakah loan hmanga an hawh Pablo Mari leh Cedric Soares te an la nghet tawh bawk. Atletio Madrid aṭangin midfielder Thomas Partey lakluh tumin an dawr mek bawk a ni.

Brazil under-20 international hian Ligue 1 club tan season duhawm a hmang, Arsenal bakah hian Napoli chuan lakluh tumin an dawr. Manchester United leh Manchester City te pawhin a ngaihven hman viau niin an tarlang bawk.

Arsenal technical director Edu chuan, “Hun rei tak chhung kan zir chiang tawh a, club dang pawhin an ngaihven viau. Gabriel hi theihna nei sang tak a nih avangin Mikel Arteta enkawlna hnuaiah player pawimawh leh ṭangkai a ni thei ang,” a ti.

Gunners manager Arteta chuan, “Arsenal-ah Gabriel kan lo lawm lut che. Lille-ah a theihna leh thiamna chu a pho chhuak tawh, Arsenal player ni chunga hma a sawn zel tur hi hmuh a châkawm tawh,” a ti. Season liam ta khan inelna hrang hrangah match 34 khelin, league-ah palina a nihpui.

Gabriel Magalhaes-a’n Arsenal a zawm fel hnu lawkah ‘London is Red’ tih chu twitter-ah a pho chhuak, sawi zui a hlawh nghal. London khawpuia club lian dang Chelsea leh Tottenham te chuan lawm takin an lo dawngsawng ve dawn lo tih a chiang.

Troyes leh Dinamo Zagreb tan pawha khel tawh defender chuan, “Club hrang hrang aṭangin sawmna ka dawng ve a, ka inngaihtuah nasa viau. Kan chhungkua, agent leh club lam nen pawh kan sawi khawm.

“Arsenal club kalphung leh chin ṭhan dan hian min hneh a, tunah chuan ka zawm fel ta. Arsenal jersey ha chungin ka theihtawp ka chhuah ang,” a ti. Tlarhnung venhim bakah ball pass thiam a nihna hi Arteta-a’n a duh chhan lian tak nia ngaih a ni.

Arsenal defender rinrawl ber chu David Luiz a ni a, kum 33 mi a ni tawh. Brazil international hian season khat daih chauh contract a nei tawh a, hun rei tak chhawr theih a ni dawn tawh lo. Kum 19 mi Saliba leh Gabriel (22) te hian Luiz kiangah zir belh tur an la nei dawn.

Saliba hi 6 ft 4 in zeta sang a ni a, Gabriel hi 6 ft 3 in a ni thung. Khelhna hmun an chuhpui tur Mari pawh 6 ft 4 in a ni, set peice - a bik takin ball kanga buai ṭhin Arsenal hian an buaina chinfel nan player sang an la khawm tih a chiang.

Arteta-a’n season hmasa khan Kieran Tierney a lalut a, season tir lamah hliam vangin buai mah se season tawpah meuh chuan rinrawl a ni tawh. Season tharah Gunners hian tlarhnung thar an rem theih a rinawm.

Player thar an lalut a, a ṭhenkhat an chhuak thung ang. Coronavirus vanga sum harsatna an neih lai hian Arsenal-in player lakluh nan pound maktaduai 41 an hmang tawh. Midang an lalut leh dawn a nih chuan an neih sa hralh ṭhen a ngaih hmel - hming langsar zingah vice captain Hector Bellerin a tel. 

Spain international hi Paris Saint-Germain chuan pound maktaduai 25-in an dawr a, pound maktaduai nga danga pung leh thei turin an ti - indawrna awm mah se thu chiang a la awm thei lo. Chhuak tura sawi lan Ainsley Maitland-Niles erawhin contract a ziak dawn hnai niin an sawi leh tawh thung.

Midfielder Matteo Guen-douzi leh Lucas Torreira te bakah defender Rob Holding leh Sokratis Papastathopoulos te chuan an khelh phakna tur club an zawn a ngaih hmel a, wing back Sead Kolasinac pawhin khelh tam a duh a nih chuan club a zawn a ngai dawn niin a lang bawk.