Nagal a chak

India tlangval tennis khel thiam Sumit Nagal-a’n Thawhlehni zan khan US Open first round-ah Bradley Klahn chu 6-1, 6-3, 3-6, 6-1 in a hneh, second round-ah chuan seeded pahnihna Dominic Thiem nen an inkhel leh ang.

Nagal chauh hi Indian tennis player zinga tun season US Open main draw khel phak a ni, kum sarih liam ta khan Somdev Devvarman chuan a lo khel phak ve tawh bawk a ni.

Kum 23 mi Nagal chuan, “US Open-ah tualchhung player hmachhawn chu a awlsam lo hle, vanneih thlak takin set li kan khelh hnuah hnehna ka chang hlauh. Grand Slam khelh hma a Prague lama inbuatsiahna ka neih kha ka chhawr,” a ti.

Season hmasa khan Nagal hian main draw a lo khel phak tawh bawk. Nikum erawh hi chuan a match hmasa berah Grand Slam vawi 20 champion tawh Roger Federer a hmachhawn avangin chak ni hmel a hmu lo - kuminah erawh thawnthu a danglam ta.

Second round-a a hma-chhawn tur Dominic Thiem a vannei. Austrian star hi Jaume Munar nen an inkhel a, set hnih chauh an khel hman tihin a khingpui hi hliam vangin a inhnukdawk. India tlangval Nagal tan Australian Open finalist hmachhawn hi a hautak dawn.