Zo Reunification Organisation (ZORO) chuan India sorkarin India leh Myanmar ramri hung a tum leh Free Movement Regime (FMR) hlih a tum an duh lohzia lantir nan nimin khan Zokhawthar, Vaphai leh Lungleiahte Peaceful Rally an huaihawt a, mi ṭhahnem tak an tel. Rally hi Manipur state-a Tengnopal district-ah huaihawt a ni bawk.
Peaceful Rally hi Vaphaiah chuan Vaphai VC kaihhruainain zing dar 7-ah neih a ni a, ZORO General Headquarters vice president Rohmingthanga Kawlni leh YMA aiawh, VC aiawh leh MUP aiawhte'n thu an sawi. Vaphai leh khaw ṭhenawm aṭangin mi eng emaw zat an tel a ni.
India leh Myanmar Inrinni khua Zokhawthara Rally chu ZORO Ṭhalai president Michael Lalramsanga'n a kaihruai a, Zokhawthar mipui bakah, Myanmar ram chhunga Khawmawi mipuite leh YMA Sub-Headquarters, Champhai hruaitute an tel. ZORO hruaitute bakah, bialtu MLA Clement Lalhmingthanga, MLA Lalmuanpuia Punte, Champhai Sub-Hqrs YMA leh Zokhawthar khawtlang aiawh, Hualngo Peoles Organisation aiawh leh political party aiawhte'n thu an sawi.
Manipur Tengnopal district-a Rally huaihawt chu Kuki Inpi leh Kuki Students’ Organisation-in an buaipui a; Tengnopal district-ah ramri hung leh FMR ṭhiah duh lo mi ṭhahnem tak an tel.
Peaceful Rally-ahte hian mipui pungkhawmte chuan kawng an zawh a, ramri hung leh FMR ṭhiah duh lohna thuziakte an keng a ni.
Zokhawthara rally-ah hian ZORO president R Sangkawia chuan, rally an huaihawt chhan chu hnam thil tak tak a nih thu sawiin, "Zo fa zawng zawng hmalakna a ni... India sorkarin border fencing a tum leh FMR hlih a tum hi kan dodal zel dawn," a ti.
ZORO President chuan, India chu UN Declaration on the Rights of Indegenous Peoples 2007 pawmtu a nih thu sawiin, chutah chuan 'Tualṭo hnamte a bik takin khawvel sorkar ramri khamin a ṭhendarhte chu an inkawlpawhin an inṭanpui ang a, sakhaw thil leh khawtlang thil, ei leh bâr leh politics-ahte anmahni mi leh sate nen inpawh a, sawiho theihna dikna chanvo an nei. Ram roreltute'n tualṭo hnamte nena inberáwnin he dikna chanvote hi tipuitling tuirn hma an la ang,' tih a nih thu a sawi a; India-in a pawm tawh UN Declaration kalh zawnga hmalak a tum chu an hrethiam thei lo tih a sawi.
ZORO general secretary L Ramdin-liana Renthlei chuan, Zo fate chu an duh vang ni loin ram bung thumah ṭhen darh an nih thu sawiin, "Chhinlung chhuak, chhûl khat kual, thisena inzawm kan ni. Ṭhen darh kan nih tirha kan rilrua chám reng chu insuihkhawm leh a, rorelna pakhat hnuai awm a ni," a ti a, chutih laiin, India sorkarin ramri hung a tum thu a sawi.
L Ramdinliana chuan, ramri hung tum leh FMR hlih tum mek chu Zo fate'n an nêk lêt ve a ṭul thu sawiin, "Vawiinah hian hnam thisenin min au ta a ni. India sorkarin a thil tum hi a ti lui a nih chuan kan thiam angin kan chháng lêt ve ang. Ramri a hung lui a, FMR a hlîp lui a nih chuan Zo fate independence min puansakah kan ngai dawn a ni," a ti.
