Chanmari Sport Complex sak tur enfiah

Minister K Sapdanga chuan nimin khan a bial chhung Chanmari-a Mini Sport Complex sakna tur hmunhmá a enfiah a; minister Dr Vanlalthlana, sorkar official-te leh khawtlang hruaitute'n an ṭawiawm.

K Sapdanga chuan, Chanmari vengin infiamna atana ṭangkai taka an hman, School Education department ram chhunga Mini Sport Complex chu a ngaih pawimawh thu leh ṭhalaite'n infiamna changtlung zawk an neih theih nan hmá an lak thu a sawi.

School Education minister Dr Vanlalthlana chuan, School Education department ram humhalhna leh hmalak zel dan tur a sawi a; UDPA secretary Lalmalsawma Pachuau-in Mini Sport Complex sakna atana sum hmuh dan sawiin, "SASCI sum (2023-24) hmangin cheng 1,500 dah a ni," a ti.

AMC-a bialtu corporator Rosiamngheta, Chanmari Local Council chairman Lalhmangaiha leh YMA president David Lalmuankima te pawhin thu an sawi a; ZPM, Chanmari unit president Vanlalpeka'n sport complex sak dan tur ruahman chhin dan a sawifiah bawk.