Home pahnihah ṭanpuina hlân

Miss Mizoram Lunglei 2024 Jennifer Zothanzuali chuan nimin khan Sazaikawna Bethel Center leh Ramzotlanga Baptist Orphan Home-ah ṭanpuina pawisa a hlan a, MJA, Lunglei district member-te'n an ṭawiawm.

Jennifer Zothanzuali hian Miss Mizoram 2024 thlanna neih chhunga amah duhsaktute leh mi ṭhahnemngaite'n a tana sum an thawh khawm chu ama tan hmang loin, mi dangte ṭanpui nan a hmang a; Bethel Center leh BCM Orphan Home hnenah Rs 10,000 ve ve a hlan bakah, home-a awm naupangte tan sweet eng emaw zat a pe a ni.

Jennifer Zothanzuali chuan, Miss Mizoram thlan a nih laia amah duhsaktute'n sum an thawh khawm chu amah kaltlanga ṭanpui ngaite ṭanpuina tura Pathian remruat nia a hriat thu sawiin, "Keimah hi a petu niin lang mah se, a petu tak tak zawk chu ka puala sum thawhtute an ni," a ti.

Bethel Center-ah hian naupang kum 3 aṭanga 17 inkar mi 70 chuang hret an awm mek a, Baptist Orphan Home-ah nau piang hlim aṭanga kum 13 inkar mi 30 an awm mek bawk.