KHAWTHLIR

Luikawr thian fai

Mizoram State NSS Cell chuan Save the Riparian nen thawkhoin nimin khan Tlawng lui fintu luikawr tihfai hnatlang an huaihawt leh a, a zawna ni thum an hnatlanna a ni. Nimina hnatlangah hian KM Higher Secondary School NSS unit aṭangin NSS volunteer leh programme officer mi 150 chuang an thawk chhuak a, Tlawng lui fintu luikawra bawlhhlawhte an thian fai a ni. State NSS officer F Sangvuana chuan, Save the Riparian hmalakna a theih anga ṭawiawm zel an tum thu a sawi.

Paraglider lawmpui

Saitual District Sports Committee chuan nimin khan India rama paraglider naupang ber record siamtu Samuel Lalbiakhlua s/o MS Dawngzuala, Saitual Venglai chu Saitual DC conference room-ah lawmpuina Rs 10,000 an hlan a, Saitual bawrhsap Dr Lalngura Tlau-in a hmanpui.

IHC tlangzarh

Lunglei DC Ramdinliani chuan nimin khan DC conference hall-ah Lunglei district-a Integrated Health Campaign a tlangzarh. Campaign-ah hian hepatitis B leh C, syphilis, TB, STI, HIV leh natna tlángláwnah inzirtirna leh hri veite hmu chhuak tura enfiahna kalpui a ni dawn a; Lunglei district khawthlang lam - Tlabung, Zodin, Tuichawng, Nunsury, etc. aṭangin May 20-23, 2024 chhungin kalpui a ni ang.

Dawnfawh zuar

Horticulture department chuan dawnfawh chíngtute tan tunlai hian Aizawla Horticulture Directorate kawt leh, Secretariat bulah GAD remtihnain dawnfawh zawrhna hmun an siam. Dawnfawh kg. khat Rs 50-in an zuar nia thu dawn a ni.

Green Mizoram Day

State Level Sub Committee on Green Mizoram 2024 chu nimin khan Forensic Science Laboratory conference hall-ah ṭhukhawmin, Green Mizoram Day 2024 hman dan tur an rél. Ṭhutkhawm hi co-chairman H Lalengmawia, EFCC secretary-in a kaihruai a; Green Mizoram Day 2024 thupui atan 'I nunna atan thing phun rawh (Plant trees for your life)' tih an thlang a, Day hmanna pui ber leh thing phunna atan Zokhawsanga Assam Rifles hmun an thlang.