Khawtlanga dikna leh rinawmna Dinhmun enfiahna bu tlangzarh

Lunglei-a LAD office leh Lunglei College NSS unit ṭangkawp buatsaih, khawtlanga dikna leh rinawmna dinhmun enfiahna 'Local Level Integrity Perception Survey, 2020 Result' chu nimin khan additional DC R Vanrengpuia'n Excise & Narcotics conference hall-ah a tlangzarh.

Tlangzarh inkhawm hi Lunglei College-a associate professor R Lalrochama'n a kaihruai a, R Vanrengpuia chuan, "Dikna leh rinawmna, khawtlang dinhmun hre tura theihtawp chhuaha beitute an fakawm hle. A bik takin sorkar hnathawkte tan phei chuan dikna leh rinawmnaa inpumpekna hi tihmâkmawh a ni," a ti a; rinawmna chu mi tin mawhphurhna a nih avangin a taka tihhlawhtlin a pawimawh thu a sawi.

Lunglei DLAO J Miahlung chuan, Local Level Integrity Perception Survey nei tura Lunglei College NSS-te nen an thawhho dan sawiin, "NSS member 50-te'n kohhran hruaitu, khawtlang hruaitute leh hna hrang hranga thawkte hnenah feh chhuakin, mi 533 hnenah zawhna hrang hrang an zâwt a ni," a ti.

Local Level Integrity Perception Survey-in a tarlan danin, survey neihna chinah 78% chuan VC-te chu eirûkna lakah an fihlim an ring lo a, chhangtu 48% chuan an thawhpui ṭhenkhatte eirûknaah an fihlim loa an hriat thu an sawi.

Chhangtu zinga 68% chuan an hotute aṭangin thil dik lo ti tura nawrna an tawn loh thu an sawi laiin, 29% chuan an tawng tawh niin an sawi thung. Chhangtu 78% chuan an veng chhunga hlawh leh sum lak luh phû loa hausa an awm niin an sawi a, 22% chuan an hre lo thung a ni.



Share this Post

Login to comment
No Comments