Party insawhngheh a pawimawh - Lalduhoma

ZPM Organisation department chuan nimin khan Ramhlun Indoor Stadium-ah intuaitharna hun an buatsaih a, an hun hmanpuitu ZPM leader Lalduhoma chuan, party insawhngheh a pawimawh thu a sawi.

Lalduhoma chuan, political party-te'n kalphung hrang hrang an nei tih sawiin, "Party insawhngheh hi thil pawimawh tak a ni a, chumi tur chuan bial hrang hrangte viltu tur kan inruat ṭhin. ZPM pawh party naupang tak kan la ni a, party inrêlbàwlnaah zir tur kan la ngah hle a, insawhngheh chhoh zel kan ngaih avangin intuaithar reng kan ngai," a ti.

Hotute thu awih a pawimawh thu sawiin Lalduhoma chuan, "Thawhpuite tana thawhpui nuam leh pawl tana ṭhahnemngai taka thawk tura infuih tawn reng a ni. Party hi a malin a kal thei lo a, ministry leh mipui nen inpawh tlang takin a kal tur a ni," a ti a; sorkar thâ tichak tur leh hmalaknate tihlawhtling turin party insawhngheh a ngaih thu a sawi.

Lalnghinglova Hmar, minister of state pawhin thu sawiin, ZPM chu an vanneih thu a sawi a, "Pathianin min kaihruai a, mipui leh party worker thawk rim tak takte zarah roreltu dinhmunah kan ding. Kan tun dinhmunah hian kan duhtâwk mai tur a ni lo a, insawhngheh deuh deuh kan ngai. Inpekna, thathona, thawhrimna kan mamawh," a ti.

Tih tur leh tih loh tur thliar fel a ngai tih sawiin Lalnghinglova chuan, "Kan tumah kan chiang tur a ni. Inthlahdah thei kan ni lo a, party tan kan thawk a ni mai lo a, kan ram tan kan thawk bawk tih kan hre tur a ni. Kan ram rorelnaah thil thar thlentir kan tum," a ti a; Pathian ram a thlen theih an campaign dan leh an hnathawhahte mipui mit a tlung tur a nih thu a sawi bawk.