Mizoramah chhûl hmáwr cancer vei mi 620 hmu chhuak tawh

Population Based Cancer Registry (PBCR), Civil Hospital, Aizawl bultumin nimin khan Aijal Club-ah chhàl hmáwr cancer hmuh chhuah dan tur tih­chang­tlunna, SHE-CAN Study Co-Design Workshop buatsaih a ni a; Mizoramah chhûl hmáwr cancer vei mi 620 hmuh chhuah a nih tawh thu tarlan a ni.

Zirhonaah Dr Jeremy L Pautu-in Mizorama chhûl cancer (cervical) dinhmun a sawifiah a; Mizoramah chhûl hmáwr cancer vei mi 620 hmuh chhuah a ni tawh a, chu'ng zinga mi 486 (78%) chu enkawl dam an ni laiin, mi 134 an thih thu a tarlang.

Zirhona hmanpuitu National Health Mission (NHM) mission director Dr Eric Zomawia, principal investigator ni bawk chuan, HPV (Human Papillomavirus) screening (cervical cancer thlentu) zirchianna Tamil Nadu leh Mizoramah Global Alliance for Chronic Disease (GACD) leh National Health & Medical Research Council of Australia (NHMRC) nena thawkho a hmalak a nih thu a sawi.

Dr Eric Zomawia chuan, Mizoramah chuan NHM hmalaknain kum 30 chung lamah chhûl hmáwr, hnutê leh ka chhung cancer zawn chhuah nan screening neih ṭhin a nih thu a sawi bawk.