Thing zár thlâk dawn vangin lirthei tlân dan tidanglam

Traffic SP Stephen Lalrinawma chuan MLA Hostel, Tennis Court bula thing zár ṭhenkhat, mipui tana him lote chu thlâk a, senghawi a nih dawn avangin vawiin chawhma dar 11 leh chawhnu dar 2 inkar leh, naktuk Inrinni chawhma dar 11 leh tlai dar 3 inkarah lirthei tlân dan tihdanglam a nih dawn thu a tarlang.

LIRTHEI TLAN DAN TUR

* City bus chhim lam pante chu Treasury Square aṭangin Upper Republic lamah an tlan ang a, Sikulpuikawnah an chhuak ang.

* City bus hmàr lam pante chu MG Road, Sikulpuikawn-Upper Khatla lamah an kal ang a, Raj Bhavan hmar lam gate bul aṭangin Tennis Court lamah an chhuk ang a, Temple Square lam kawngah an kal zui ang.

* LMV leh two wheeler Khatla kâwn aṭanga hmar lam pan turte chu Sikulpuikawn lamah chhoin, Upper Khatla lamah an kal ang.

* LMV leh two wheeler Tennis Court aṭanga Khatla kâwn lama kal turte chu Tennis Court aṭangin Upper Khatla lamah an chho ang a, Sikulpuikawnah an kual ang.

* Traffic jam vanga harsatna a thlen loh nan a chunga tarlan kawngpui dungah lirthei dah/hûn phal a ni lo.