Synod-in 2023-24-ah nuai 39,507.74 a hmu; Kum hmasa hmuh zat 6%-in an khûm

Mizoram Presbyterian Kohhran chuan financial year 2023-24 chhung khan Rs 3,95,07,74,653 (nuai 39,507.74) an hmu a, kum hmasa 2022-23 chhunga sum hmuh aiin Rs 22,34,98,245 (6%)-in a tam a; Rs 41,44,60,653-in budget an khûm.

May 15-16, 2024 chhunga Synod Finance Committee ṭhutkhawm vawi 149-naa tarlan danin, Mizoram Synod-in sum kum 2023-24 chhunga sum a hmuh Rs 3,95,07,74,653 chu Pastoral-a lut Rs 2,21,49,26,750 leh Ramthara lut Rs 1,73,58,47,903 a ni.

Mizoram Synod hian kum 2023-24 budget chu Rs 41,44,60,653-in an khûm a, Pastoral-ah Rs 22,37,09,750 leh Ramtharah Rs 19,07,50,903-in an khûm a ni. Kum 2023-24 chhunga pastor bial tinte sum thawh khawm zat bik chu Rs 3,69,67,61,527 a ni.

Kum 2023-24 ah hian Synod chuan kum 2022-23 chhunga an sum hmuh Rs 3,72,72,76,408 chu Rs 22,34,98,245-in an khûm a, khûmna hi 6% a ni. Pastoral-ah Rs 11,70,85,503 leh Ramtharah Rs 10,64,12,742-in kum hmasa sum hmuh an khûm a; pastor bial hrang hrang aṭanga hmuh bikah Rs 22,08,47,728-in kum hmasa an khûm bawk.

Synod Finance Committee ṭhutkhawm hi moderator Rev. R Vanlalnghaka'n kaihruaiin, member 51 an tel. Synod finance officer Rev. VL Luaia Hranleh-in sum dinhmun a tarlang.