Covid-19 vei symptom nei lote In lama inenkawl dan tur peihfel

Health minister Dr R Lal­thangliana hoin nimin khan sorkar hotu ṭhenkhatte Secretariat conference hall-ah an ṭhukhawm a, Covid-19 vei, taksaa natna lang chhuak lote in lama inenkawl (home isolation) dan tur ruahmanna an thlirho a, ruahmanna chu Chief Minister hnenah thlen nghal an rél.

Ṭhutkhawmah hian Covid-19 Medical Operation Team chairman Dr ZR Thiamsanga, MLA, chief secretary Lalnun­mawia Chuaungo leh Health department official dangte an tel a ni.

Health Minister chuan, kohhran leh YMA ṭhenkhatin an hmunhmáte CCC atana hman an phal chu lawmawm a tih thu a sawi a, "Mizo nih nawmna leh Kristian nih nawmna an tilang a, lawmthu ka sawi. Tuna sorkarin CCC atana a ruahman sa kan hman mekte a khah hnua indaih lohna a thleng a nih pawhin, kohhran leh YMA zarah kan thla a muang hle a ni," a ti.

Meeting-a tarlan danin, Mizoramah Covid-19 vei an pun zel avangin ruahmanna thar siam a ni a; a bika enkawl ngai lo, Covid-19 symptom lang chhuak lo, doctor/medical lama mithiamte'n asymptomatic tih an hriatpuite chu an dinhmun azirin mahni ina inenkawl phalsak mai an rél a ni.

In lama inenkawl turin inkhung hranna pindan leh bual-in hrang mi dangin an ṭâwmpui loh nei, an awmna village/local task force-te'n an remtihpui hnuah leh Health department-in an hmunhmate an endik hnua in lama inenkawlna tlaka an pawmte chu ina inenkawl phalsak ni se, an ti.

Home isolation-a inenkawlte chu darkar 24 chhunga vil rengtu an awm a ṭul a, Health department-in an vil reng a ngai. Dan zawm tur chi hrang hrang a awm a, chu'ng zingah chuan home isolation-a awm chhungte zawm turte pawh a tel a ni.

Meeting-in home isolation chungchanga ruahmanna an siam hi Chief Minister remtihna lak a nih hnuah notification chhuaha hman theih a ni ang.



Share this Post

Login to comment
No Comments