Nimin April 22 kha Earth Day a ni a, Mizorama hmun ṭhenkhatah hman niin, thupui chu 'Planet vs plastics' tih a ni.

Earth Day hi Environment, Forest & Climate Change (EFCC) department chuan Aizawla Chief Wildlife Warden pisa conference hall-ah an hmang a, assistant principal chief conservator of forest Kalmal Preet-i'n kaihruaiin, principal chief conservator of forest Ashok Kumar Biswal khuallian a ni.

Earth Day hmannaah hian Ashok Kumar Biswal-a'n thu a sawi bakah, Joseph Lalrinfela, Hlimen hnenah SEL Foundation Award for Clean & Green Earth hlan a ni. Joseph Lalrinfela (9) hian a hun âwlah Hlimen huam chhunga lên khawthawnna hmun hrang hranga plastic bawlhhlawh a chhar khawm ṭhin avanga chawimawina hlan a ni a; chawimawina hian Rs 25,000 leh thuchei a keng.

Ashok Kumar Biswal chuan, ram dangte nen khaikhinin Mizoramin ram ngaw a neih ṭhat thu a sawi a, "Amaherawchu, enkawl leh venhimna lamah hmalak ṭhat a ngai. Khawvel hi kan ta ni loin, khawvel ta kan nih angin zah tak leh duat taka enkawl tur kan ni," a ti.

Mizoram PCCF chuan, Mizoram hmun hrang hrang a fan kualnaah Mizoram chu ram mawi leh nuam tak a ni tih a hmuh chian thu a sawi a; mahse, Mizoram chu tihchhiat mek zel a nih thu leh lui tui pawh a tlêm tial tial thu sawiin, "Ram mamawh hydel project leh thil lian tham neih nan chuan ramngaw ṭha neih hmasak a ṭul a, kan ngaw leh luite hi kan humhalh a ṭul em em a ni," a ti bawk.

Mizoram Pollution Control Board chairman Liankima Lailung chuan, MPCB hnathawh leh hmalaknate leh Earth Day chungchanga inzirtirnate a sawi a; Centre for Environment & Social Justice (CEJC) working chairman Vanramchhuangi pawhin thu sawiin, leilung leh a chhunga awmte humhalh a ṭulzia leh plastic-in ram a tihchhiat nasat tawhzia a sawi a ni.