Vote thlaktuah mipa aiin hmeichhia an tam; Vote tla percentage-ah mipa a sang zawk
April 19, 2024-a Lok Sabha inthlan vote thlakah Mizorama vote tla zawng zawng 4,87,013 aṭanga 50.47% chu hmeichhe vote a ni a; chutih laiin, hmeichhia aiin mipaah vote tla a ṭha zawk.
Election Commission of India-in Mizorama vote tlâk dan a tarlan aṭanga a lan danin, Mizorama mipa voter 4,14,805 zinga 2,41,213-in vote an thlâk a, chu chu voter mipa zat aṭangin 58.15% a tling. Voter hmeichhia 4,41,559 zinga 2,45,800-in vote an thlak a, 55.67% a ni a; mipa voter aia hmeichhe voter tamna hi 26,754 a ni.
Mipa voter awm zat aṭanga chhûta mipa vote thlâk tamna ber Tuichawng bialah niin, voter 36,511 zinga 26,463-in vote an thlâk a, 77.35% a tling. Hmeichhe voter awm zat aṭanga chhûta hmeichhe vote thlak tamna ber West Tuipui bialah hmeichhia 7,972 zinga 5,399 (67.72%)-in vote an thlak. Mipa vote thlak tamna ber leh hmeichhe vote thlak tamna ber inthlauhna chu 9.63% a ni.
Hmeichhe voter awm zat aṭanga chhûta hmeichhe vote thlâk tlemna ber chu Lawngtlai East bial a ni a, Lawngtlai East bialah hian hmeichhia voter 13,508 zinga mi 6,439 (47.67%)-in vote an thlak. Aizawl East-I bialah mipa voter 13,948 zinga 6,724-in vote an thlak a, vote tla percentage 48.21% niin, Mizorama Assembly constituency 40 zinga mipa vote tla a chhiatna ber bial a ni.