Chetsualnaah mi pathum an thi

April 21, Pathianni khan hmun pahniha lirtheia chetsualnaah mi pahnih an thi a, tuia tlâk vangin mi pakhat a thi bawk.

Pathianni tlai lam khan Laldinpuia (26) s/o Lalrinpuii, Durtlang chu Tuirial luiah a chesual a, chhan tum ni mah se an chhan hman lo a, tuiah a tla hlum. A tlak aṭanga rei vak loah a ruang lak chhuah nghal a ni a, YMA, Tuirial Branch-in an hall-ah thlahna hun an hman zawhah Durtlang khawtlangin an la a, nimin khan vui a ni.

Pathianni vek khan tlai dar 4 velah Lalduhawma (Taua), Aizawl Venglai chu Ramhlun Venglaia luikawrah scooty-in a tlân liam a, damdawi-in panpui a nih laiin a hliam tuar loin a thi.

Thu dawn danin, Lalduhawma hi luikawr aṭanga lak chhuah a nih laiin a la harh a, mahse, lirtheia damdawi-in panpui a nih laiin a hliam tuar loin a thi a, nimin chhun dar 12 khan vui a ni.

Pathianni zan dar 8:30 vel khan Muthi khaw bulah Tata Punch car chesualin, kawng thlangah a tlân liam a, mi pathum chuangin, Joseph D Thansanga, Zuangtui chu chetsualna hmunah a thi a, mi dang pahnih erawh ngaihtuahawm an ni lo.

Vanduaina tâwkte la chhuak turin mi tlawmngai eng emaw zat an thawk chhuak a, Central YMA hnuaia Quick Response Team pawh pun an ni a, zan dar 10:30 velah an la chhuak kim thei. Joseph D Thansanga hi nimin chhun dar 12 khan vui a ni.