Lok Sabha inthlana hmalakna thlir lêt

Champhai district election officer James Lalrinchhana, bawrhsap hoin nimin khan DC conference hall-ah Lok Sabha inthlana hmalak dan thlir lêtna hun hman a ni. DEO chuan, inthlanna langtlang leh rin ngam neih a nih theihna tur leh mipui vote thlak zirtirnaa chanchinbu mite leh political party-te ṭawiawmnaah lawmthu a sawi.

James Lalrinchhana chuan, "Election kaihhnawih hmalakna puanzar leh vote thlak tura mipui zirtir kawnga chanchinbumite hmalakna a fakawm a, inthlanna langtlang leh rinngam neih a nih theih nana tel ve zel tura beisei political party-te'n sawmna ngai pawimawha min ṭawiawm zel ṭhin avangin kan lawm takzet," a ti.

Model Code of Conduct (MCC)-a la nung reng thu leh dan zâwm chunga kal zel a ṭul thu sawiin DC chuan, inkaihhruaina siamte ṭha takin zâwm zel turin political party-te a chah a; vote chhiar a la ni dawn a, hmalak dan turte ruahman mek zel a nih avangin, ruahmannate thâ thlah loa a tàwp thlenga tihlawhtling tura inpuahchah a ngaih thu a sawi.

Ṭhutkhawmah hian hmalakna hrang hrang zingah election training ṭha tak neih a ni te, inthlan hma tlaia polling station tlawh te, traffic management felfai tak leh inbiakpawhna ṭha tak ruahman a ni te, a vawi khat nan polling station-ah Scouts & Guides an duty-te, buaina lian tham awm loa inthlanna felfai tak neih a ni chu lawmawm an tih thu an sawi.