Kan candidate-ah kan lungrual - Tawnluia

MNF party chuan nimin khan an pisa MIzo Hnam Rûnah inkhawm an nei a; thusawitu, MP Election Campaign Directorate chairman Tawnluia chuan, Lok Sabha inthlana an candidate K Vanlalvena-ah an inlungrual thu a sawi.

Tawnluia chuan, inthlan neih zawh tâkah an party mi, dan leh thupek kengkawhtu, MPF leh tlawmngai pawlte chungah an lawm thu a sawi a, "Kan candidate-ah kan lungrual em em a, hmun hrang hrang aṭanga report kan dawn danin, beiseina kan nei sang hle," a ti.

MP thlanin MNF party-ah ṭanrualna ṭha zawk a pho lang nia sawiin Tawnluia chuan, "Kan ram, kan hnam leh sakhua venhim hi MNF chuan kan thupui ber a ni a, Mizo nationalism champion-pui hi kan tum ber a ni," a ti a; an candidate K Vanlalvena chu ram tana mi huaisen tak a ni tih mipuiin an hriat avangin an chak an inbeisei thu a sawi.

MNF treasurer Lalruatkima pawhin thu sawiin, "MNF hian tunlai khawvel mila ke kan pên zel a ṭul. ZPM lam pawh MLA thlan ang em em kha chuan neutral-in an thláwp ṭha tawh lo niin ka hria. Khawvelah zir tàwp ní a awm lo a, kan ram leh hnam kaihruai tur hian inzir zel tur kan ni," a ti.