KHAWTHLIR

Faina beihpui

Mission Veng Local Council chuan nimin khan Sikulpuikawnah Mission Veng Faina Beihpui hawnna hun an buatsaih a, an veng pa R Lalnuntluanga'n a hawng. Hawnna inkhawm hi LC vice chairman Lalhminghlua'n a kaihruai a, bialtu MLA Lalchhuanthanga leh LC chairman Ramengmawia ten thu an sawi. Faina beihpui thlak hi kohhran inkhawmah te, an venga sikul hrang hrangahte neih tum a ni a, faina hnatlang neih ṭhin an tum bawk.

Thliin lên chim

Nimin zinga thli tleh khan Lalhmudika, Falkawnte chenna in a lên chim. Thu dawn danin, in chim hian Lalhmudika te chhungkua a chimpui a, Lalhmudika nupuiin hliamin, damdawi-inah hruai a ni a, ngaihtuahawm lutuk a ni lo. Mi dangte erawh chu an hliam na lo thung.

AR-in heroin man

Assam Rifles sipaite chuan April 21, Pathianni khan Zokhawtharah mi pakhat hnen aṭangin heroin (no. 4) gram 44 an man a, Rs 30,80,000 hû a ni. Heroin leh a neitu hi Zokhawthar Police Station-ah an hlàn.

Draft roll tlangzarh

Siaha district election officer VL Hruaizela Khiangte, bawrhsap chuan nimin khan Lopu II-a village council by-election-a hman tur draft electoral roll a tlangzarh a, final electoral roll chu May 14, 2024-ah tlangzarh tum a ni. Draft electoral roll-a a lan danin Lopu-II VC-ah hian voter 135 an awm a, mipa 71 leh hmeichhia 64 an ni.

Zangnadawmna pe vat turin phût

MZP chuan thuchhuah siamin, April 21, Pathianni tlaia BSF lirtheiin a chîl hlum Lalawmpuia (12), Durtlang North chu Durtlang Middle School II-a pawl ruk zirlai a nih thu an tarlang a, "Thil thleng hi pawi kan ti hle. A mawhphurtu chu a phu tâwk hremna pe tur leh vanduaina tâwkte chhungkua zangnadawmna pe vat turin kan phût. Kan zirlaipui a sut hnuah buaipui zui loa an tlan chhe zui hi kan hrethiam lo hle," an ti.