Eptu lamin min beisei sang - K Sapdanga

ZPM chuan nimin khan an pisaah chhung inkhawm an hmang a; thusawitu ZPM hruaitu K Sapdanga, Home minister chuan, ZPM kaihhruai sorkar chu eptu lamin an beisei sàn thu a sawi.

K Sapdanga chuan, Assembly session neih zawh tâkah eptu lamin sorkar an beisei sànzia chiang taka a hriat thu sawiin, "An sorkar hun laia an tih theih loh zawng zawng ti thei turin min beisei a, kan tih theih ngei pawh an ring. An sorkar laia an sûlhnu chhia zawng zawng pawh siamṭha turin min beisei a, an khawih pawi tawhte pawh siamṭha turin min ring ngam tih a hriat theih," a ti.

Leiba cheng vaibelchhe sing chuang an rochun avangin hnathawh a harsa naménlo tih sawiin Sapdanga chuan, "Kan Chief Minister-in hma a hruai si a, kan zui lo thei lo a, inhrêk theih chi apiangah kan inhrêk. Sorkar hnathawkte pawh an fakawm tak zet," a ti a, sorkar hnathawkte chu inrenchem kawngah ṭhahnemngai ber ber an nih thu a sawi.

K Sapdanga chuan, sorkarin hun vawn dik a duh tih sorkar hnathawkte'n an hriat thu sawiin, "Thupek chhuah hran ngai loin hunbi dika pisa thlen tumin an phe suau suau a, office laklawh laia pawihawia office chhuahsan pawh an awm tawh mang lo. Office bàn hun thlengin dàwr tur an awm ṭhup ta mai. Directorate lam pawh hun vawn dik dan enfiah mek a ni," a ti.

Sorkar hnathawkte'n a hun dik taka hlawh an lâk an phúa an hriat thu sawiin Minister chuan, "Hlawh lak ní pawh ni 15 aṭangin thla tìr lamah kan sawn hnai hret hret thei a, rei lo têah a dan tur dik takin thla tawp ní emaw, thla thar ní emawah hlawh an lâk leh theihna turin kan ṭang fat fat a ni," a ti.

Disaster Management & Rehabilitation minister Sapdanga chuan, kum dang zawng aiin rial a tla hma a, a tam bakah a len avangin chhungkaw tam takin in leh lo an chàn phah tih a sawi a, "Kum danga thleng khát tak, chhawmdawlna sum kan dawn tur angte central aṭangin kan dawng kim hman ve leh tlat a, chu chuan chak takin chhawmdawl hna min thawhtir thei a ni," tiin, rialin in a den chhiat aṭanga ni nga chhungin DC tinah vanduaite chhawm­dawlna tur an pek kim hman thu a sawi.

Kalphung thar, mipui sorkarin thla nga hmél a hmu ve ṭan tih sawiin Sapdanga chuan, "Sorkar kaw­chhung kan han luhchilh ve a, a la rei lo vei nen, siamṭhat hna hi khawi aṭanga bul ṭan ber tur nge tih thlan bik tur a váng khawp mai. A chhe lai siam­ṭha tur hian a chhe lo lai a váng em a ni," a ti.

K Sapdanga chuan, thlai thar hralhna ngaihtuahsak turin an intiam tih sawiin, "Chumi atan chuan budget-ah rua­hmanna siam a ni.. Kan hotupain a sawi pakhat chu - sorkar zár zo tam tum chuan sawhthing thar tam tum mai tur tih a ni," a ti a, thar tam apiangin sorkar zár an zo tam dawn niin a sawi.