Ṭhahnemngai taka thawktute vangin kan chak a rinawm - Vanlalhmuaka

BJP, Mizoram State chuan nimin khan an pisaah chhung inkhawm an hmang a; thusawitu Lok Sabha candidate Vanlalhmuaka, Mizoram BJP president chuan, an party member ṭhahnemngai taka thawktute vangin Lok Sabha inthlanah an chak ngei a rinawm thu a sawi.

Vanlalhmuaka chuan, India ram hmun dangah inthlan kalpui mek a la nih thu sawiin, "Chu'ng hmunahte chuan INDIA alliance lam pawhin inhamtàn hram hram tumin hma an la ve mek a, an thil tum erawh result-in a rawn hai lang dawn. BJP leh a thawhpuite chuan party dang sawichhiat ngawr ngawr kan thupui a ni ve lo a, Congress leh a thawhpui INDIA tih dan ang lo takin dâwt hmangin emaw party dang chhiatna lai khei vak hi kan tih dan a ni ve ngai lo," a ti.

Mizorama BJP-te'n missionary hna thawk an ni tih an inhriat a ngaih thu sawiin Vanlalhmuaka chuan, "Mizoram Kristian ram kan intih ang hian kan hnathawhnaah te, sorkar hna kan thawhnaahte kan rinawm a ngai. Pathian thu hi sawi ni loin kan nunah a lang tur a ni. Central hruaitute khuan keimahni aṭanga Krista hmel hmuh an duh," a ti a; hnathawh result aṭangin nihna dik tak miin an hmu ṭhin tih a sawi.

Mizoram BJP President chuan, politics chu Pathian rawngbawlna a ni tih hriat a pawimawh thu sawiin, "Ram rawngbawlna kalkawng a ni tih kan chian a ngai. BJP Mizoram chuan chu chu hre thar leh ang u," a ti a; mi dang tana malsawmna ni zel tura hna thawk turin an party mite a chah.