BSF lirtheiin naupang a su hlum; Mipui an pungkhawm; driver jail-ah dah

April 21, Pathianni tlai dar 5 vel khan Border Security Force (BSF) lirthei Scorpio-in Lalawmpuia (12), Durtlang North a su hlum. BSF lirthei hi a tlân tlang a, mipui lungawi lo chu Durtlang North-a BSF camp gate bulah an pungkhawm. Lirthei khalhtu hi Pathianni zan khan man niin, nimin khan Central Jail-ah dah luh a ni.

BSF lirthei hian Lalawmpuia hi thirsakawr a khalh lai ICFAI University panna kawng péng bul, Durtlang North-ah a sû a; lirthei chu dingin, a hnunga chuang pakhat leh a khalhtu, BSF mi ve ve chu lirthei aṭanga chhuakin thil awm dan an enfiah. Mahse, mi pahnihte chu lirtheiah lut leh nghalin, a bul hnaia awmte'n dan tum mah se, an tlanchhe zui a ni.

Lalawmpuia hi damdawi-in panpui nghal ni mah se, damdawi-in thlenpui a nih chuan a hliam tuar loin a thi tawh. Nimin khan vui a ni.

BSF sipaite chêt danah lungawi loin Durtlang North mipuite chu Durtlang North-a BSF camp gate bulah an pungkhawm a, boruak sosáng deuh mah se, lirthei khalhtu chu police-in an man tih an hriat hnuah boruak a dài deuh. Police kuta BSF sipai awm chu lirthei khalhtu nen inang loa hriatna a awm avangin boruak a sang leh deuh bawk.

Buaina chhuak tur véngin police eng emaw zat BSF gate bulah an duty a, BSF camp chhungah mipui an luh lohna turin an dang. Mipui punkhawm lai hian lock-up chhunga BSF mi leh sa awm lai lanna video leh lirthei khalhtu ngei a ni tih sawina video chu social media lamah thehdarh a ni. Mipuite chu zan dar 11 velah an ṭîn darh.

Lirthei khalhtu hi nimin khan court-ah hruai a ni a, court chuan jail-a dah turin thutlukna a siam. A chungchang chu May 5, 2024-ah ngaihtuah a ni ang.