Congress leh MNF sorkar laiin SMS min pe thei lo - Richard-a

Lok Sabha inthlana ZPM candidate Richard Vanlalhmangaiha chuan, Hnahlan khuaa grape chíngtute tana project an siamah Congress leh MNF sorkar laiin state matching share (SMS) an dil hlawhtlin theih loh thu a sawi.

Richard Vanlalhmangaiha hian nimin khan ZPM pisaah thu sawiin, "Inthlan hma khan grape chíngtute chungchangah 35% a lâr hle. He thil hi ka sawi chhuak ve lem lo a, a chhan chu mimal intihhmingchhiat ka duh loh vang a ni. Sorkar laipui khuan market intervention scheme neiin, sum hloh rulh dan turah state sorkar tum ve tur 25% leh central sorkar tum tur 75% a awm," a ti.

Congress sorkar laiin Chief Minister ngeiin lehkha ziahsak mah se, state sum thawh ve tur 25% chu sum neih loh chhuanlamin an pe thei ta lo tih sawiin Richard-a chuan, "A hnua MNF sorkarah pawh matching share kan dil a, min pe thei lo," a ti a; tih theih dan tur nasa taka ngaihtuahin sum leh pai an sên nasat thu a sawi.

Richard Vanlalhmangaiha chuan, 35% an sawiah senso zawng zawng khung khawm a ni tih sawiin, "Mahse, nasa taka min beih nan an hmang ta hlauh. Chuti chunga kut hnathawktute hmangaih ber ni àwm taka an insawi ṭhin hi a mak tak zet. Mimal intihhmingchhiat leh inbeih vak vak hi ka tih dan leh duh dan a ni ngai lo a, tihngaihna a awm tâk loah chuan criminal complaint pawh hreh tak chungin ka thehlut ta a ni," a ti.