Kan party inlungrualna a ṭha - K Vanlalvena

Lok Sabha inthlana MNF candidate K Vanlalvena chuan, Lok Sabha inthlan vote thlak zawh takah an party an inlungrual thu a sawi.

K Vanlalvena chuan, amah duhsak taka candidate petu MNF hruaitute chungah leh duhsaka amah vote-tu zawng zawng chungah a lawm thu a sawi a, "Pathian chu engkim ti thei a ni. A chungah rinna kan nghah chuan engkim a ti thei vek a, a rintlak a ni," a ti.

Campaign-na tur sum a neih loh thu sawiin Vanlalvena chuan, "Hmun hrang hranga mahni sum sénga feh chhuak zawng zawngte chungah ka lawm," a ti a; MLA inthlana MNF candidate vote-lotu tam takin tun MP thlanah kha chuan amah an vote nia a hriat avanga a lawm thu a sawi.

MNF party chu Assembly inthlanpuia tla hlim ni mah se an inlungrual ṭha tih sawiin MNF candidate chuan, "Tlin leh tlin loh chu Pathian thu thu ni mah se, beiseina sang tak ka nei," a ti.

K Vanlalvena chuan, ruling party khing an nih piah lamah, opposition party hrang hrangin candidate an neih avangin beisei ang an pha ta lo a nih pawhin Pathian remruatah pawm thiam turin an party mite a chah bawk.