Lengpui Airport chei ṭhat hna thawh zawh hun tur pawhsei a ni. Hetih lai hian, Ministry of Development of North Eastern Region (DoNER) chuan airport chei ṭhatna tur sum a pe chhuak kim tawh.

Airport chei ṭhatna project, Improvement/upgradation of operational/non operational facilities of Lengpui, elevated road with connected of terminal building under NESIDS-ah hian cheng nuai 1,959 ruahman a ni a, September 30, 2021-ah hna thawh ṭan a ni.

Hna thawh zawh hun tur a tira ruahman chu March 30, 2023 a ni a, mahse, zawh hman a nih loh avangin December 4, 2023-a zawh turin hun pawhsei a ni. April 11, 2023 thleng khan hna thawh tur hmun lia ṭhena hmun thum (75%) thawh zawh a ni tawh.

DoNER chuan Lengpui Airport chei ṭhatna tur sum a pe chhuak vek tawh a, sum ruahman cheng nuai 1,959 chu ṭum hnihah an pe chhuak kim. Pek chhuah hmasakah cheng nuai 783.60 a pe chhuak a, a ṭum hnihnaah cheng nuai 1,174.40 an pe chhuak leh bawk.

Airport chei ṭhat hna thawktu chu Kamlova Chhangte (Kamrul Lashkar)-a firm KR Construction, Ṭhuampui, Aizawl a ni a, hna thawk turin September 20, 2021 khan inremna (agreement) ziahpui a ni.

Lengpui Airport chei ṭhat hna a huna zawh theih loh chhan Mizoram PWD-in an tarlan ṭhenkhat chu - Covid-19 léng leh Lengpui Airport chu hman reng a nih avang te, Airport kal tluang pangngai tibuai lo tura hna thawh a ngaih vanga hna thawh theih hun chhung a tlem vangte a ni.

Tarlan tawh angin, DoNER minister of state BL Verma-a'n April 11, 2023 khan Lengpui Airport chei ṭhat hna thawh mek a tlawh a, Mizoram PWD hotute chuan December 2023-ah zawh a nih tur thu an lo hrilh laiin, Minister chuan October 2023-ah zo turin a chah a ni.