Kan sorkar chuan thlai man hresain thlai kan chíng tawh ang - Lalduhoma

ZPM leader Lalduhoma chuan, an party-a market study team-in thlai chi hrang hrang hralhna man (rate) an duang chhuak dawn a, an sorkar chuan thlai thar hralhna hre sa loa chìn awm tawh loin, a man hre sain loneitute'n thlai an chìn dawn thu a sawi.

Lalduhoma hian April 14, 2023 khan Vairengte Field Venga ZPM Serlui Joint Block Conference a hmanpuinaah thu sawiin, “Tunah hian market study team-te'n kan thlai thar, a bik takin sawhthing, aieng, hmarcha leh hmunphiahte a rate mumal takin an rawn duang chhuak dawn a, Pathian zara sorkarna kan chan huna a bul ṭan chawp leh zawn chawp ngai lo turin India ram mai ni lo, foreign company kan dawr turte pawh lo be lâwk vek turin mawhphurhna kan pe a ni," a ti.

Market study team chuan chak takin hma an la mek nia sawiin Duhoma chuan, "An inpeih hunah a rate kan puang dawn a, kumtluana risk-a thlai kan chìn kha awm tawh loin, a rate hre sain thlai kan chíng tawh ang," a ti a; chutianga an tih chuan ramin hma a sawn phah ngei an beisei thu a sawi.

ZPM Leader chuan, an sorkar chuan tun aia hlâwk zawka thlai hralhna an ngaihtuah dawn thu leh kuhva tharte chu a hringa hralh tihtawp an tum thu a sawi a, "A um ṭawih (scope) hi a thei theiin lo ti ula, bul kan ṭanpui dawn che u a ni. A tihro kan duh bawk a, hmun hrang hrangah a tihrona kan din ang a, duh danah chuan mimalin din se, sorkarin kan pui dawn a ni," a ti.

Serlui bial chu sangha dil tamna hmun a nih thu sawiin Lalduhoma chuan, "A chi siamna kan ngaihtuah zel dawn. Sangha hi kan la intodelh lo em em a, kan rama sangha dil siamna tura hmun ṭha leh remchang 20% chauh kan la hmang ṭangkai a, 80% kan la hmang ṭangkai lo, hengte hi kan ngai pawimawh dawn a, thapuiin kan nawr dawn a ni," a ti a; sanghaa intodelh mai ni loin, ram páwna thawn chhuah tham neih vat an tum dawn thu a sawi.

ZPM Leader chuan, bul ṭanna leh eizawnna ngêlnghet nei lote tan 'Bána kaih policy' an duang tih sawiin, "Chhungkaw tinte kan duh zawng trade leh project-ah a bul ṭanna kan neih loh avanga kan thlir liam mai mai a awm tawh lohna turin puih tlâk chu kan pui ang a, loan thlengin kan ngaihtuahpui dawn," a ti bawk.

Lalduhoma hian ZPM zawm thar mi 1,717 a lawm lut niin ZPM party thuchhuah chuan a tarlang.