Doctor-te'n a thlawnin mi 27 an zai

Association of Surgeons of Mizoram (ASM), Association of Surgeons of India (ISA) leh Indian Society of Anaesthesiologists (ISA)-te chuan April 15, Inrinni khan Champhai District Hospital-ah a thlawna inzaina, Free Surgical Camp an buatsaih a, mi 27 an zai.

Free Surgical Camp-ah hian inzai thiam (surgeon) 11, hnimhlum la thiam (anesthesiologist) pathum leh anmahni puitute an tel a; damlo zai ngai zingah zaipui (major surgery) tihsak mi 27 awmin, chu'ng zinga pasarih chu naupang an ni.

Champhai district-a la tih ngai loh, zai hawn ngai loa verhna khawl hmanga mît paih (laparoscopic cholecystectomy) tih nghal a ni a; April 14 zan khan Champhai District Hospital Doctors' Lounge-ah seminar an buatsaih bawk.

Association of Surgeons of Mizoram hi kum 2018 khan Association of Surgeons of India (ISA), North East Chapter hnuaiah din a ni a; Champhaia a thlawna inzaina an buatsaih hi free surgical camp an buatsaih vawi hnihna niin, nikum khan Lungleiah an lo buatsaih tawh a ni. Kum tin Mizoram hmun hrang hrangah a thlawna inzaina ṭum khat tal buatsaih zel an tum bawk.