Thlai herna tur pack house hawn a ni

Agriculture minister C Lalrinsanga chuan April 15, Inrinni khan Ngopa rama Saphmuahna Mualah Zaupui Organic Farmers Producer Company-te'n thlai an herna hmun tur pack house a hawng a; Ngopa Block Agriculture office leh Ngopaa Agriculture department hmunhmate a en bawk.

Zaupui Organic FPC hi Mission Organic Value Chain Development for North East Region hnuaia din a ni a; khaw 18-ah loneitu 934-te'n hma lain, an thlai chìn pui ber chu hmarcha a ni. Thlai herna tur pack house-ah hian aieng, chhawhchhi, anṭam, hmarcha, vaimim, nihawichi leh sawhthing her theih tura ruahman a ni.

Agriculture Minister chuan, thâ thlah loin intodelhna kawng a zawh zel niin a sawi a, "Organic movement kan kalpui hian rah ṭha a chhuah mek a, tun hnaiah pawh USA thlengin kan organic hmarcha thar kan hralh thei ta. Organic thlai hi a hrisel piah lamah a market a ṭha a, organic farming lama kan hmalakna hi na zawka kalpui turin hmabak thui tak kan la nei," a ti.