NH sira tui luankawr tifai turin YMA-in quarry neitute an hriattir

YMA, Awithangpa Group hruaitute chuan April 15, Inrinni khan Kawnpui leh Bualpui inkara lung lakna quarry neitute chu hna an thawhna hmunah kal chilhin, national highway kawngpui aṭanga quarry panna kawng an siamin tui luankawr (side drain) a hnawh avangin rang taka tui luankawr tifai turin an hriattir a; YMA ngenna an zâwm lo a nih chuan a ṭul anga hma an lak zui dawn thu an hrilh.

Awithangpa Group YMA hruaitute chuan, Kawnpui leh Bualpui inkara quarry neitute'n tui luankawr an hnawh avangin kawngpuiah tuihâwk a luang lut a, kawngpuiah chirhdiak a tam phah bakah a nâl phah thu an sawi a, "Kawngpui a chhe thuai zel a, hei vang hian kum rei tak chhung he lai chhehvel kawng hi chhe takin a awm tawh ṭhin a ni," an ti.

NH kawngpui chungchangah hian Awithangpa Group YMA conference chuan hmalak an rêl a, chumi ang chuan group YMA hruaitute'n hma an la zui a; kawngpui siamtute pawh kawngpui blacktop thuai turin an ngen dawn tih an sawi.

Awithangpa Group YMA hmalakna hriain Kolasib DC John LT Sanga chuan April 15, Inrinni zan khan quarry kawngin NH kawngpui sira tui luankawr a hnawhte chu thenfai vek a nih theih nan thupek thar tihchhuah a nih tur thu a sawi nia thu dawn a ni.

Kawnpui SDO(C) Cheemala Siva Gopal Reddy pawhin YMA hmalakna chu ṭha a ti a, a theih ang anga bawhzui nghal a tum thu a sawi nia tarlan a ni bawk.

Kawnpui bula NH kawngpui chhia chungchangah kum 2020 khan Kawnpui Hmarveng Branch YMA chuan hma an la tawh a; quarry panna kawngin tui luankawr a hnawh pin siamṭha tura an ngenna quarry neitute'n an tihhlawhtlin loh avangin YMA chuan JCB hmangin an lo siamṭha tawh a, quarry neitute chu hume pipe emaw, culvert emaw siam/dah turin an hrilh nghal.

Kum 2021-ah pawh Hmarveng YMA-in hma an la leh a, September 2022 khan Kawnpui SDO(C), NHIDCL, Kawnpui VC leh Hmarveng YMA-te chuan quarry neitute chu tui luankawr tifai turin an hrilh leh bawk.