CM-in Bru Boisu a hmanpui

April 15, Inrinni khan Cultural Centre-cum-Auditorium, Vaiva­kawnah Bru Boisu hman a ni a, chief minister Zoramthanga'n a hmanpui.

CM Zoramthanga chuan, hnam tênau leh tlém zawkte chhawmdawl leh chawisan chu sorkar laipuiin a ngaih pawi­mawh thu sawiin, Bru hnamte'n hmasawnna tura mamawh an neihte chu project siamin sorkar laipuiah a kaihhnawih department-te kaltlangin bawhzui a nih tur thu a sawi.

Zoramthanga chuan, Mizoram chu state lian lo a ni a, hmasawnna hna thawhna tur sum pawh state lian zawkte nena khaikhinin a tam tâwk lo tih a sawi rualin, sorkar laipuiah project siamin hmasawnna hna thawhna tur hai chhuah tur tam tak a awm thu a sawi a; Mizorama Bru zirlaite awmna tur hostel sakna tur an dil chu sorkarin a ngaihtuahpui tur thu a sawi a ni.

Chief Minister chuan, hnam nunphung leh zia lama hmasawnna tur ngaihtuah a ṭul thu leh mahni hnam zia chhawm nun zel a pawimawh thu a sawi a; Mizorama hnam hrang hrangte chu inlungrual taka awmho a pawimawh thu a sawi bawk.

Bru Boisu-ah hian hnam làm leh zai hrang hrang entir a ni a, BWUI president Biakthuama Molshoy leh Organising Committee chairman M Malsawmthanga te pawhin thu an sawi a ni.