Dan loa thil tawlh rûk kan donaah Ngaihnathiam bik neih a rem lo - DGP

Director General of Police (DGP) Devesh Chandra Srivastva chuan tun hnai khan zan khat riakin Khawzawl SP office, Khawzawl Police Station leh 2nd IR Battalion headquarters-te a tlawh a; dan loa thil tawlh rûk donaah ngaihnathiam bik neih a rem loh thu a sawi.

DGP chuan, dan loa kuhva tawlh chu Mamit leh Kolasib-a loneitute'n an tuar tih sawiin, "State sum leh pai a nghawng pha. Leiṭha (urea) tawlh rûk chu methamphetamine siamna atan hman a ni. Dan phal loh thil tawlh ruk donaah ngaihthiam bik neih a rem lo," a ti.

Devesh Chandra Srivastva chuan, ráltlân chungchanga YMA rorel ṭha a tih thu sawiin, ráltlânte'n harsatna an siam loh nan vên thiam an ngaih thu a sawi.

Mizoram DGP chuan, Khawzawl Police Station-a thubuai ziah luhah kum 2020 aṭangin rûkrûk leh in rawk a pung tih a sawi a, a chhan zir chiang a, chonaah ngai turin Khawzawl police-te a chah.

Thubuai ziah luh tam hreh lo tura chahin DGP chuan, "Thubuai ziah luh tlem hi a chinfelna a ni lo. Thubuai ziah luh a tlem chuan mi zawng zawngin boruak a rálmuang lutukah an ngai ang a, an mamawh ang ṭanpuina an hmuh loh phah thei a, chuvangin, pawikhawihna leh suahsualna thleng a awm chuan thubuai ziah luh zel tur a ni," a ti.

DGP hi KVK, Khawzawl Complex-ah DC K Lalrohlua leh SP Lalchhuanthanga hoin lo hmuah a ni a; Khawzawl police-te'n heroin (hawng 23) an man, tualchhunga hralhna anga cheng nuai 143 man chu KVK Incinerator-ah hâl ral nghal a ni.