KHAWTHLIR

Thisen pe

April 15, Inrinni khan KṬP, Kulikawn Branch chuan Civil Hospital, Aizawl tan thisen unit 54 an pe a, petute mipa 45 leh hmeichhia pakua an ni. KṬP, Dawrpui Vengthar Branch-in Synod Hospital tan thisen unit 46 pein, petute mipa 39 leh hmeichhia pasarih an ni a; KṬP, Ramthar Tlangveng Branch pawhin ZMC blood bank tan unit 40 an pe a, petute mipa 33 leh hmeichhia pasarih an ni. Inrinni vek khan ṬKP, Muallianpui Bialin Lunglei Civil Hospital tan thisen unit 73 an pe a, petute mipa 60 leh hmeichhia 13 an ni.

Kuhva rah man

Saitual police-te chuan April 15, Inrinni zan khan Saichal péngṭhuamah lirthei pakhat aṭangin Myanmar aṭanga dan loa lak luh nia hriat kuhva rah ip 90 (kg. 6,300) leh lirthei khalhtu Lalchharliana, Zokhawthar, Champhai district nia inchhál an man. Kuhva rah hi Customs Preventive Force, Seling hnenah an hlan a ni.

Heroin man

Special Narcotics Police Station team leh 2nd Assam Rifles-te chuan April 14, 2023 khan heroin gram 63.7 (hawng 5) an man a, international market-ah cheng nuai 30 hû a ni. Heroin hi Zodinsanga (26), New Champhai leh VL Hruaitluanga (29), Champhai Bethel Veng nia inchhalte hnen aṭanga man a ni a; Special Narcotic PS-ah thubuai ziah luh niin, chhui mek a ni.

Minister-in hlân

Minister Lalrinawma chuan April 15, Inrinni khan Dinthar YMA Hall-ah Serchhip district leh Aizawl district-a YMA branch 22 leh Ngentiang PHC leh Chhingchhip PHC hnenah oxygen concentration a hlan. Oxygen concentrator hi Formasa Foundation India-in an pek a ni.

Rangva sem

Champhai North bialtu MLA Dr ZR Thiamsanga chuan April 15, Inrinni khan a bial chhunga Selam khuaah Social Research and Demonstration Corporation hnuaiah chhungkaw 10 hnenah rangva a sem. ZR Thiamsanga chuan, mi tinin in leh lo an neih theih nan sorkarin theihtawpin hma a la zel dawn niin a sawi.