Saitual district-a Hliappui khua chuan kumin chhungin sawhthing cheng nuai 147 vel man an hralh tawh. Sawhthing an tharte leitu tur tender hmangin an zawng ṭhin.
Hliappui Spicies Producer Company (HSPC) chairman H Thantluanga hnen aṭanga thu dawn danin, Hliappui khua hian kumin chhungin hlâwm deuhin sawhthing ṭum thum an hralh tawh a; ṭum khatnaah tender loa hralhin, kg. khat Rs 20-30 inkarin an hralh a, cheng nuai 69 vel man an hralh.
Ṭum hnihnaah tender hmangin an hralh a; a thawh khatnaah kg. khat Rs. 54-a hralh niin, cheng nuai 52 man an hralh a, a thawh hnihnaah Rs 50-a hralhin, cheng nuai 26 vel man an hralh. Tender hmang hian sawhthing hralh zel an tum a, hralh tur eng emaw zat an la nei a ni.
H Thantluanga chuan, Hliappuiah sawhthing chíngtu chhungkaw 300 vel an awm thu sawiin, "Hlâwk zawk leh ṭha zawka hralh a nih theih nan kan inko khawm vek a, tlem tê têa hralh chuan a hlâwk loh avangin a hlâwma hralh turin kan relpui. Anni lamin thu awih takin tlem tê têa hralh tawh loin, a hlawma hralh turin an dah a ni," a ti.
A hma chuan commission (la chhawngtu)-te hnenah sawhthing ip 4-5 velte an hralh ṭhin thu sawiin H Thantluanga chuan, "Hetiang a nih hi chuan a rate a ṭha thei lo. Chuvangin, quality ṭha zawk a hlawma hralh dan kan ngaihtuah ta a ni," a ti a, tender hmanga hralh chu HSPC-in an buaipui liau liau a nih thu a sawi.
HSPC hian sawhthing lei tur an neih zat chu Mizoram páwna sawhthing lei ṭhinte an hrilh a, an lei ngamna zat an zâwt ṭhin. Sawhthing lei ṭhinte chuan Mizorama an thawhpuite hmangin an lei ngamna zat an sawi a, a lei huai ngam ber hnenah hralh ṭhin a ni.
Tunlai hian state páwnah sawhthing man a tlâkhniam thu sawiin H Thantluanga chuan, "Kum tin financial year tàwp lamah chuan sawhthing man a tlahniam ṭhin a, chuvangin, kan tender duh rih lo. Rate a ṭhat veleh kan tender leh ang," a ti.
HSPC Chairman chuan, sawhthing chíngtute aṭangin HSPC-in sum lâk an nei lo tih sawiin, "An rethei rei lutuk tawh a, chuvangin rate ṭha thei ang berin hralh se kan duh ber," a ti a; tun ang zela an hralh thei a nih chuan sawhthing chíngtute tan hah man a awm telh telh tur thu a sawi.
HSPC hi kum 2018-ah din niin, Mission Organic Mizoram (MOM)-ah an inziak lut. MOM hian a tirah sawhthing chingtute'n a chi an leina atan Rs 8,500 ṭheuh a pe a, a hnuah pawh hmanraw mamawhte an pe ṭhin a ni.
