KHAWTHLIR

Minister-in tlawh

Health minister Dr R Lalthangliana chuan nimin khan Saichal, Hliappui leh Pàwlráng khuaa health sub-centre-te health & wellness centre-a hlàn kai tawhte a tlawh a; an harsatna leh mamawhteah theihtawpa hma an lak tur thu a sawi. Ngopa damdawi-in (CHC) pawh tlawhin, damdawi chi hrang hrang a pe a ni.

MHIP inkhawmpui

MHIP, Hringlangtlang Block chuan nimin khan Mualkawi community hall-ah inkhawmpui vawi 1-na an hmang a, minister of state TJ Lalnuntluanga'n a hmanpui. Hringlangtlang Block MHIP hi June 24, 2022 khan din a ni a, Sub-Hqrs, Champhai hnuaia block pathumna a ni. Block chhungah Mualkawi, Mélbûk, Hruaikàwn, Buang, Khuangléng, Bulfekzawl, New Hruaikawn leh Dilkàwn branch-te a awm a, member 1,363 an awm mek. Din a nih hnuah mi 33 an ṭanpui tawh a ni.

MLA-in hmanpui

ZPM Aizawl West-III Block chuan nimin khan Bungkawn Vengthar YMA Hall-ah conference an hmang a, bialtu MLA VL Zaithanzama'n a hmanpui. Zaithanzama chuan, "ZPM thlipui a tleh a, a la tleh na zual zel dawn. Mipuiin sorkar ṭha an duh a, keini hi Pathian thil tum a hlawhtlin theih nan min hmang thei a ni. Ram hmai tibâltute hi rûk hmang te, nawhchizuarte an ni lo a, ram enkawltute an ni zawk ṭhin. He ram hian sorkar ṭha a mamawh a, chumi din tum chuan ke kan pên zel a ni," a ti.

Fimkhur turin chah

Mizoram Police chuan online hmanga thil chahnaah fimkhur turin mipui an chah. Police thuchhuah chuan, driving license, credit/debit card PIN dil an awm chuan inbumna a nih thu te, rinhlelhawm emaw, rin tlâk loh tura ngaih website hawng lo tur leh an inkaihhruaina zâwm lo tur te, online-a thil hlu leh pawimawh chahin billing address leh shipping address inang hman ṭhin tur a nih thute a tarlang a ni.