Police-in March 2023 chhungin dan bawhchhia mi 84 man

Mizoram Police chuan kumin March thla chhung khan Mizoram hmun hrang hrangah dan loa thil tawlh/phurh, ralthuam kawl leh rûkrûk thubuaiah mi 84 an man a, thubuai ziah luh vek a ni.

Police-te hian Assam Rifles leh tlawmngai pawlte nen thawkhoin March 1-31, 2023 chhung khan Mizoram hmun hrang hrangah heroin gram 3,881.86 (kg 3.88) leh kuhva rah ip 2,607 (kg. 1,93,420) an man a; rûkrûk vangin mi 24 an man bawk. Police tarlan chinah heroin an mante chu international market-ah cheng nuai 1,750 hû a tling.

KUHVA RAH

Mizoram Police leh an thawhpuite'n March 2023 chhung khan dan loa Myanmar aṭanga lak luh kuhva rah phurh ṭum 17 an man. Kuhva phurhna lirthei khalhtu mi 37 manin, kuhva rah man zawng zawng chu ip 2,607 a ni a, a vaiin kg. 1,93,420 a ni.

Kuhva rah man tam ber ṭum chu March 3, 2023 kha niin, lirthei palia phurh kuhva rah ip 379 (kg. 30,320) leh lirthei khalhtu mi pali man an ni a, IPC Section 188 hnuaiah thubuai ziah luh a ni. March 13 khan Bolero pickup pakhat aṭangin kuhva rah ip 30 (kg. 2,400) an man a, hei hi March thla chhunga man tlem ber ṭum a ni thung.

RUIHHLO

Kumin March thla chhung khan Mizoram Police-in Mizoram hmun hrang hrangah ruihhlo - heroin leh ganja kaihhawihah mi 18 an man a, chu'ng zinga pali chu Myanmar mi niin, pakhat chu Tripura mi a ni a, mi dang 13 chu Mizo an ni.

Mi 16 hnen aṭangin heroin gram 3,881.86 (kg. 3.88) man a ni a, international market-ah Rs 17,50,15,000 hû a ni. Mi pahnih aṭangin ganja gram 5.092 an man bawk.

Police-te hian March 6, 2023 zana Tripura mi pakhat hnen aṭanga heroin kg 2.853 an man chu March thla chhunga ṭum khata an man tam ber a ni a, cheng nuai 1,400 hû a ni.

RALTHUAM, LEIṬHA & RAMSA

Police chuan kumin March thla chhung khan hmun pahnihah silai pathum, silai mu leh magazine-te an man a; chumi kaihhnawihah chuan mi pathum an man.

March 19, 2023 khan lirthei pakhatah dan phal loha phurh leiṭha (urea) ip 500 leh lirthei khalhtu Assam mi pakhat an man a, Essential Commodities Act section 7(1)(a)(ii) hnuaiah thubuai an ziak lut.

March 6, 2023 zan khan lirthei pakhat aṭangin police-te chuan Myanmar aṭanga phurh ramsa (exotic wildlife species) chi 17 an man a, sava chi hrang 13 leh zawng chi li a ni. Ramsa leh a phuthna lirthei chu Custom Preventive Force, Champhai kutah an hlan.

RUKRUK

Mizoram police-te chuan March thla chhung khan Rs 5,19,270 rûk thubuaiah mi panga an man a, pawisa rûk zinga a tam zawk chu hmuh lêt a ni.

March thla chhung khan phone rûk thubuai 12-ah mi pali, cable wire kg 17.8 rûk thubuaiah mi pasarih, two wheeler pathum rûk thubuaiah mi pathum leh thil dang rûk thubuai pathumah mi panga an man bawk. March thla chhunga rûkrûk vanga an man zawng zawng chu mi 24 an ni.