YMA, Sairang Dinthar Branch hmalakna kaltlangpui lo turin CYMA-in a hriattir

YMA, Sairang Dinthar Branch chuan April 10, 2023 ral hmain an hnena Rs 1,00,000 pe turin ABCI Construction an phût a, hun tiam chhunga an pek loh chuan na taka an chet (rough action) dawn thu an hrilh. Hemi chungchang hian dem a hlawh hle a, Central YMA-in hma la zuiin, kaltlangpui lo turin an hriattir.

Sairang Dinthar Branch YMA-in an letter head hmanga ABCI Construction manager/incharge hnena lehkha an pek chu tunlai hian social media-ah thehdarh a ni a, lehkhaa ni (date) inziak chu March 28, 2023 a ni. Lehkha hi sawiseltu leh demtu an tam hle a ni.

Sairang Dinthar YMA-in an lehkhaa an tarlan danin, Sairang Dinthar huam chhunga construction company-te'n March 25, 2023-a an intiam angin, ABCI chu an Branch YMA hnenah April 10, 2023 ral hmain Rs 1,00,000 pe turin an hriattir a, "Sum (contribution) hi pek a nih loh chuan Branch YMA-in in lakah na takin hma a la dawn a, hnathawktu dan loa awmte ILP endik a ni ang," an ti a ni.

Sairang Dinthar YMA hmalak dan hi Central YMA chuan ṭha a tih loh avangin nimin tlai khan CYMA hruaitute chuan an president R Lalngheta hoin Sairang Dinthar YMA hruaitute chu an khuaah kal chilhin an ṭhutkhawmpui a; ABCI hnena an hmalakna chu kaltlangpui lo turin an chah.

Vanglaini palai zawhna chhangin CYMA president R Lalngheta chuan, Sairang Dinthar YMA hmalakna chu YMA kalphung a ni lo tih hruaitute an hrilh tih sawiin, "YMA angin kan tih ngai loh a ni tih kan hrilh a, an hrethiam khawp mai. An rilru a ṭha a, an naupang tláng a, 'Thil kalphung kan lo hre lo a ni e,' an ti a, kan sawite pawh an pawm khawp mai," a ti.

CYMA President chuan, Sairang Dinthar YMA hruaitute chu ABCI hnena an hmalakna kaltlangpui lo tura an hrilh thu sawiin, "Lo ti zui suh u, kan ti a, an kaltlangpui lo turah kan ngai. Company (ABCI) lamin an pe duh hrim hrim a nih erawh chuan an thu a ni," a ti.

A hmain ABCI nen an lo ṭhukhawm tawh a, ziaka thlen tura an inchah avangin Sairang Dinthar YMA chuan ziakin an thlen ta nia an sawi thu a sawi bawk.