Ramri chungchanga a thil phûtte Mizoramin Assam hnenah a thehlut

Ramri chungchanga Assam sorkar nena inbiakna bawhzuiin Mizo­ram sorkar chuan ramri chungchanga an thil phûtte Assam sorkar­ah a thehlut tawh.

November 17, 2022-a Guwahati, Assam-a Mizoram sorkar leh Assam sorkar inbiak ṭumin Joint Declaration-ah Mizoram sorkarin ramri china a pawm chhunga khaw awm te, an huam chin te, geo spatial extent te, a huam china chengte hnam chanchin leh chi (ethnicity)-te leh chanchin dangte Assam sorkarah thehlut tura tih a ni.

Joint Declaration-ah chuan, "Heng chanchin thehluhte hi ramri buai chinfelna tur atana la din tur state pahnih aiawte telna Regional Committee-te'n an enfel ang. Chanchin lâk khawm kawngah Assam sorkar chuan Mizoram hi a theihna apiangah an pui ang," tih a ni.

Assam team leader Atul Bora, Border Protec­tion & Development minis­ter chuan tun hnai khan Mizoram sorkarin a thil phûtte an thehluh tawh thu a sawi a, "Rei tak Mizoram Home Minister kaihhruai Mizoram aiawhte nen kan inbe tawh a, tun ṭumah hi chuan eng emaw tak a thleng tawh ang," a ti.

Tarlan tawh angin, Assam leh Mizoram ramria Mizoram sorkar dinna chu Bengal Eastern Frontier Regulation 1875 a ni.