Ngopa-in khawpui fai ber nih an lawm

Ngopa khua chuan kum 2022-a khawpui fai inelnaa pakhatna an nih chu nimin khan an khuaa Jubilee Hall-ah an lawm a, minister Dr R Lalthangliana leh bialtu MLA Dr L Thangmawia ten an hmanpui.

Minister Dr R Lalthangliana chuan, Mizorama khawpui fai ber nih chu thil harsa tak a nih thu sawiin, Ngopa khua khawpui fai ber an ni thei chu chhuanawm a tih thu leh an thawhrimna fakawm a tih thu a sawi a, "In khua a fai mai bakah, rilru fai leh thianghlim lo pu zel ang che u. Mi dang tana hnawksak lo, mi dang tana malsawmna ken tlat hi faina hian a keng tel a, mi dangte tan luang chhuak nun neih hi Pathianin nung tura min duh dan a ni," a ti.

Health minister R Lalthangliana chuan, Covid-19 léngin tun thlengin sorkar hna lâk a la nghawng tih a sawi rualin, ṭan an la zel dawn tih a sawi a, "Ngopa CHC building sak thar pawh kan hna hmasa tur a ni ang," a ti a; Mizoram sorkarin kum 20 chhung dental doctor a lâk tawh loh hnuah tun hnaiah tlem azawng an la thar a, lâk thar zinga mi chu Ngopa-ah dah tel a nih thu a sawi.

R Lalthangliana chuan, Lengteng bialtu MLA Dr L Thangmawia chu bial mipui tana ṭhahnemngai tak a nia sawiin, an thlan tlin nawn leh chuan an tihfuh hle a rin thu a sawi bawk.

Dr L Thangmawia pawhin thu sawiin, khawpui fai inelnaah kum hnih chhunga pahnihna aṭanga pakhatnaa an inhláng kai thei chu lawmawm a tih thu a sawi a; Ngopa leh Lengteng biala sorkarin hma a lak tawhnate a tarlang bawk.