LMC councillor hmasa ber atana thlan ZPM candidate-te ka lawmpui - CLP Leader

Congress Legislature Party (CLP) leader Zodintluanga Ralte chuan thuchah tichhuakin, Lunglei Municipal Council (LMC) councillor hmasa ber atana thlan ZPM candidate 11-te a lawmpui tak zet thu a tarlang.

Zodintluanga Ralte chuan, Lunglei khawpuiin LMC a nei ta chu lawmawm a tih thu tarlangin, "Ka lawmpui tak zet. LMC inthlanna hmasa ber March 29, 2023-a felfai taka neih zawh taka LMC councillor hmasa ber atana thlan tlinte thinlung takin ka lawmpui a, Lunglei mipui tana phurrit ni lo a, hmasawnna thlentu ni turin duhsakna ka hlan," a ti. 

CLP Leader chuan, political party hrang hrang candidate-te'n thianghlim taka theitawp chhuahin inthlan an hmachhawn tih sawiin, "A zahawm ka ti. Inthlanna felfai leh thianghlim tak buatsaihtu State Election Commission leh thawktute thawhrimna chhuanawm ka ti," a ti a, candidate tling zo lote chu tawnhriat hlâwkna ṭha nei a, inpawm thiam a, hma lam hun ṭha nei turin duhsakna a hlan.

Mahni political party leh candidate tana rim taka thawktute hlawhtlinna a lawmpui thu a sawi rualin, theihtawp chhuaha hlawhtling zo lote chu hnual lo turin a chah bawk.

CLP Leader chuan LMC councillor atana thlan chhuahte'n Lunglei khawpui leh mipui beisei anga ṭha taka hna an thawh a beisei thu sawiin, "Lunglei khawpui hmasawnna leh mipui tana rorelna dik thlenna kawnga hma hruaitu an nih theih nan duhsakna sang ber ka hlan a ni," a ti.