LMC chairman tur Lalzuithanga

Lunglei Municipal Council (LMC) inthlana sorkarna siam tura tling ta ZPM party chuan LMC chairman atan Lalzuithanga an ruat a, vice chairman atan K Lalrinawma an ruat bawk.

ZPM party hian nimin khan Lungleiah LMC inthlana an chak an lâwm a, ZPM presi­dent Lalliansawta'n a hmanpui. Inkhawmah hian LMC sorkara hotu tur - chairman leh vice chairman tur puan a ni a; chairman atana ruat Lalzuithanga chu Ward-III aṭanga thlan tlin a ni a, vice chairman atana ruat K Lalrinawma chu Ward-VII aṭanga thlan tlin a ni.

Lalliansawta chuan an ward awmna te, an mizia, an kum leh nihna bakah party dinhmun leh hmasawn zel dan turte thlir chungin uluk leh fimkhur takin LMC chairman leh vice chairman turte an ruat thu a sawi.

Lunglei mipuite chungah ZPM hminga lawmthu sawiin ZPM President chuan, "Min duhsakna ang ngeiin chhânlêt ve kan tum dawn che u. Party thar Mizorama sorkarna pawh la chelh miah lote chungah risk la kan candidate-te chungah pawh kan lawm hle ," a ti.

ZPM President chuan Vanglaini palai zawhna chhángin, executive councillor turte erawh chu an la tifel lo tih a sawi a, "Official lam aṭangin thu chiang kan la hmuh loh avangin executive councillor tur kan la tifel thei rih lo," a ti.

Hetih lai hian, muni­cipal (LMC, etc.) enkawltu Urban Development and Poverty Alleviation (UDPA) department director H Lianzela chuan Vanglaini zawhna chhang­in, LMC-ah hian executive councillor pathum aia tlem lo an awm thei dawn tih a sawi.