Felfai taka duan lâwk loh avangin kawng a indaih lo, lirthei dahna a ṭha tâwk lo - CM Zoramthanga

Chief minister Zoramthanga chuan, Aizawl khawpui chu a tìr aṭanga mumal leh felfai taka duan lâwk a nih loh avangin kawng indaih lohna a awm thu leh lirthei dahna a ṭhat tâwk loh thu a sawi.

CM Zoramthanga hian nimin khan Aizawl Two Wheeler Taxi Association (ATTA)-in Vanapa Hall-a General Assembly vawi 5-na an hman a hmanpuinaah thu sawiin, Aizawl chu khawpui ṭhenkhat anga a tìr aṭanga mumal leh felfai taka duan lâwk a nih loh avangin sorkar leh mi ṭhahnemngaite'n theihtawp chhuah mah se, kawng indaih lohna a awm thu leh lirthei dahna a ṭhat tâwk loh thu a sawi. Boruak ziaawm zelah parking-a harsatna sukiang turin sorkarin hma a lâk zel tur thu a sawi bawk.

Zoramthanga chuan, Mizoram sorkarin Parking House Support Scheme (PAHOSS) a kalpui chu hripui léng vanga sum indaih lohna avangin tum anga kalpui theih a nih loh thu a sawi a, "Mizoram hi kan ram neih chhun a ni a, a chhunga chengte'n kan siam nawm leh kan nuamin, kan chei nawm loh leh kan nuam lo mai dawn a ni," a ti.

Two wheeler taxi chu khawpui ṭhang zel leh kawngpui tâwt zelah mipui tan a ṭangkai thu sawiin CM Zorama chuan, lirthei khalhtute chu fimkhur tur leh ruih theih thila buai lo turin a chah a; ATTA hruaitute hnenah an pawl tana a ṭula hman turin Rs 50,000 a pe.

Chief Minister chuan, ram siamṭha turin mi tin an pawimawh thu a sawi a; tunlaia ram hmelma lian ber pakhat chu ruih theih thil a nih thu sawiin, ruihhlo donaah sorkar, mipui leh pawl hrang hrangte'n theihtawp chhuaha an do tlân a ṭul thu a sawi bawk.

ATTA Assembly-ah hian Tourism department-in tourism kaih­hnawihah awareness cam­paign hun an hmang a, Traffic Additional SP pawhin thu a sawi.

ATTA-ah hian member 2,500 vel an awm a, Aizawlah two wheeler taxi stand 50 a awm mek a ni.