RBI-in leiba hnem berah min puang; an sawi pial ngar ngar - Lalduhoma

ZPM leader Lalduhoma chuan, Mizoram sorkar chu sum a enkawl thiam loh avangin Reserve Bank of India-in leiba ngah berah min puang a, chu chu Mizoram sorkarin a sawi pial ngar ngar niin a sawi.

Lalduhoma hian nimina Sakawrdai community hall-a ZPM Tuivawl Block Conference vawi 7-na a hmanpuinaah thu sawiin, "RBI-in kum thum chhung ba hnem bera min puan chian em em lai pawha ba nei tlem bera kan la insawi tlatte hi hrilhfiah theih pawh an ni lo a, an sawi pial ngar ngar a, a manganthlak tak zet. Pathian duh dan zawnga he ram hi enkawl a nih hunah he ram hi a kal dik ang a, malsawmna pawh kan dawng dawn a ni," a ti.

ZPM Leader chuan, sorkarna an chan chuan hmar lam kawtchhuah an ngai pawimawh hle dawn tih sawiin, "Kawng leh luite hi a theih anga ṭhaa cheibàwl kan tum dawn. Sinlung Hills Council hian dan mumal tak a neih theihna turin Assembly House-ah kan lo au ve tawh a, dan mumal tak kan nei ta hi a lawmawm a, a nihna tur anga hman a la ni lo erawh a pawi hle... ZPM a sorkar hunah Aizawla SHC office awm pawh he lai hmunah hian sawn a ni ang," tiin a sawi.

Sorkarin ram leilung a enkawl ṭha lo tiin, "Kan leilung hi a enkawltute'n kan enkawl ṭhat loh avangin hliam a tuar mek a, kan leivûng paih dan mumal loh avangin chhiatna kan tuar mek a, kut hnathawktute manganna hial a thlen a ni," a ti a; rilru thar pu chungin Mizoram tan ke pên tur leh ṭhahnemngai taka bei turin kalkhawmte a sáwm.

Inkhawmah hian Lalduh-oma'n an party zawm thar mi 634 a lawm lut niin ZPM thuchhuah chuan a tarlang.