Governor leh BRO hotu an inkâwm

Border Roads Organisation (BRO) director general Lt.Gen. Rajeev Chaudhry chuan nimin khan Raj Bhavan-ah Governor Hari Babu Kambhampati a kâwm a; Larsap chuan, Mizorama Project Pushpak hna-thawhte chu a hun taka zawh a nih theih nan theihtawp chhuah turin a lo chah.

Governor Hari Babu Kambhampati chuan, Mizoramin BRO-te kawng laih leh enkawl a chhawr ṭangkai thu leh BRO hmalaknate a thlàwp thu a sawi a, "Project Pushpak hnuaiah hnathawh mekte chu a chhawrtu tur mipuite'n an mamawhna a sàn tawh em avangin a hun taka thawh zawh a nih theih nan theihtawp chhuah ang che u," a ti.

Lt.Gen. Rajeev Chaudhry chuan, April 2, 2023 khan Champhai-Hnahlan-Khuangphah kawng Project Pushpak-in a thawh mek chu a endik tih Governor a hrilh a; BRO hmalak tawhna leh hma-chhawpte a sawipui bawk.