DAY-NULM hnuaia hna thawh ṭhat lawmman cheng nuai 1,000 dawng

Mizoram sorkara Urban Development & Poverty Alleviation (UDPA) department chuan DAY-NULM scheme a kalpui ṭhat vangin Ministry of Housing & Urban Affairs (MoHUA) aṭangin Systematic Progressive Analytical Real Time Ranking (SPARK) award cheng nuai 1,000 a dawng.

Sorkar thuchhuah tarlan danin, MoHUA hian kum tin DAY-NULM scheme atan state tinte target a siamsak a, target mila hna thawk ṭhate tehfung SPARK chu kum 2019-20 Financial Year aṭangin a kalpui ṭan a ni. Incentive award anga kalpui niin, a hmingah SPARK Award vuah a ni a, financial year khata central fund dawn tura ruahman bakah, incentive award pek belh ṭhin a ni.

State-te hnathawh dan chu MIS leh Paisa Portal hmangin state tinin thla tina an hnathawh leh hmalakna an tarlante aṭangin teh a ni. Mizoram chu North-East & Himalayan Range (state pakua) huam chhungah awmin, SPARK award kalpui ṭan kum, kum 2019-20 leh kum 2020-21 khan pahnihna a ni a, chu'ngah chuan lawmman cheng nuai 600 vel a dawng.

Sorkar kum 2021-22 leh 2022-23 chhunga DAY-NULM scheme hnuaia state hrang hrang hmalakna result chu March 31, 2023 khan MoHUA chuan a puang a, Mizoram chu pakhatna niin, Mizoram sorkar hnenah performance incentive cheng nuai 1,000 a rawn pe a ni.