Nimin kha Parliament budget session tawp ní a ni a, Rajya Sabha (RS)-ah Citizenshep (Amendment) Bill, 2016 (CAB) pharh tum ni mah se, pharh a ni lo a, tiamchin awm loin session tihtawp a ni. Hei vang hian CAB hi a thi (lapse) zui tura ngaih a ni. Hemi chungchangah hian Mizoram aṭanga Rajya Sabha member Ronald Sapa Tlau chuan, mipuite hnehna leh Pathian ropuina a nih thu a sawi.
RS Legislative Procedure-a inziah dan chuan, Lok Sabha (LS)-a bill la pass loh, RS-ah pawh la pass lohte chu LS ṭhiah ni mah se, a tawp (lapse) kher lo a; LS-a pass tawh hnua RS-a pass nawn a nih hmaa LS ṭhiah a nih chuan bill chu a tawp (lapse) thung.
Tun ṭuma Parliament budget session hi LS inthlanpui neih hmaa session hnuhnung ber tur a ni a, inthlan a hnaih tawh avangin Parliament hi ṭhiah a, sorkar thar hnuaia Parliament term thar kalpui a nih tawh dawn avangin CAB pawh a tawp phah dawn taa ngaih a ni. Lok Sabha term kal lai hi June 2-a tawp tur a ni a, chumi hma chuan, March/April velah inthlanpui a awm tura ngaih a ni.
CAB hi January 8, 2019-ah Lok Sabha-ah pass a ni a; Rajya Sabha-ah pawh February 12, Thawhlehni khan pharh tum ni mah se, Samajwadi Party-te'n an hotu Akhilesh Yadav chunga thil thleng duh lohna lantira rorel inkhawm an auh buai avangin pharh hman loin inkhawm tihtawp a ni.
Nimina rorel inkhawmah pharh leh tura tih ni mah se, Rafale Deal chungchanga Comptroller and Auditor General report chu eptu lamte'n sawiselin an au buai leh a, rorel theih a ni lo.
Rajya Sabha inkhawm tihtawp lailâwk hnua chhun dar 12:30-a chhunzawm leh a nihin debate nei tawh loin, budget session ṭan nia President Ram Nath Kovind-a thusawi chungchanga lawmthu sawina, motion of thanks pass a ni a, interim budget leh Finance Bill-te pawh sawiho loin pass zui a ni. Chumi hnu, chhun dar 12:48-ah RS session chu tiam chin awm loa tihtawp a ni ta a ni.
CAB pass loa RS inkhawm tihtawp a nih takah chuan Mizoram MP Ronald Sapa Tlau chuan lawmawm a tih thu a sawi a; "India hmarchhak biala CAB veitu zawng zawng, a bikin Mizoram veitu, Bill pass a nih lohna tura theihtawpa thinlung leh tih tak meuha ṭawngṭaina nena beitu te, kawng zawhnaa tel tawh te, Protest Day-a kal zawng zawng te, hma latu zawng zawng kha Mizoram aṭanga RS MP awm chhun hian lawmthu ka hrilh. Mipuite hnehna a ni a, Lalpa ropuina a ni," a ti.
Ronald Sapa chuan, "Bill an sût takah chuan 'Hnára hlît phawi ang huai a ni' tih pawh hian a hril zo loin ka hria a, a lawmawm hle mai. Parliament-a ka awm ve tawh chinah vawiin hi ka hlim ber ní a niin ka hria," a ti a; Arunachal Pradesh aṭanga MP, Union minister of state for Home Kiren Rijiju pawhin, 'Ka lawm chu ka ti hreh viau nâ a, ka thinlung tur chu i hria ang,' tia a hrilh thu a sawi.
Mizoram MP chuan, nimin chhun dar 12:15 ah CAB chungchanga boruak awm dante RS chairman Venkaiah Naidu hoin party hrang hrangte ko khawmin thlirho a ni tih sawiin, "Bill hi drop kan rel thlu ta a ni," a ti a; CAB chu RS-ah pharh a nih pawha dodal turin a duh lotute chu engkim huama an intèl ruh thu a sawi.
Ronald Sapa chuan, CAB avang hian Meghalaya aṭangin chief minister Conrad Sangma leh a hote mi eng emaw zat Delhi-ah an chhuk thla a, Nagaland leh Manipur aṭang pawhin hotute an thawh thlak thu a sawi a, "Assam-a BJP Chief Minister pawh Union Home Minister-in a ko a, mahse, a rawn kal duh lo. Kan ram aṭang erawh chuan boruak a dai hle a, tu'ma hmel a rawn lang lo niin a lang a, a lungchhiatthlak viauin ka hria," a ti.
Ronald Sapa Tlau chuan, CAB chungchangah BJP hotute pawh an inlungrual lo nia sawiin, "Prime minister Narendra Modi leh an party mi tlem azawngte chauh an ṭangho a, lehlamah Rajya Sabha-a chairman Venkaiah Naidu te, BJP president Amit Shah-te ho pawhin opposition-te ṭan dan zawng zawng an hmuh hian a tlang dawn lo tih hriain nawr luih loh mai an duh tawh a ni," a ti a; nimina PM Narendra Modi-a, RS session-a a kal pawh a heh a hil viaua a rin thu a sawi.
