MNF leh NPP-in lawmthu an sawi

Citizenship (Amendment) Bill, 2016 (CAB) Rajya Sabha-a pass a ni ta lo chu lawmawm an tih thu, MNF party leh National Peoples' Party (NPP) chuan thuchhuah siamin an tarlang.

MNF chuan, Mizo mipui leh hmarchhak mipuiin an duh loh em em CAB pass loa Rajya Sabha ṭhutkhawm tiam chin awm loa tihtawp a ni chu lawmawm an tih tak zet thu sawiin, "Bill pass a nih lohna turin kohhran hote nasa takin kan ṭawngṭai a, Joint NGO-in theihtawpin hma a la a, NESO pawhin theih­tawp a chhuah. Pu Zoramthanga, chief minister pawhin Prime Minister leh Home Minister-te hnenah na takin Bill a duh lohna hi a thlen a, Council of Ministers pawhin ṭum hnih lai Bill duh lohna a pass a ni," an ti.

NPP chuan, CAB dodal kawngah Meghalaya chief minister Conrad K Sangma, NPP president ni bawk hoin hmarchhaka regional party hrang hrangte'n hma an la tih an sawi a; CAB chu kaltlangpui a nih tâk loh avangin NPP-in CAB dodalnaa a thawhpui party - MNF, AGP, NPF, NDPP, ITPF, HSDP, UDP, Khanam, PDf, Shivsena, RJD, ADIMK, JDP leh Congress party-te chungah lawmthu an sawi tih an tarlang.