ZIDCO Chairman-in pisa a luah ṭan

ZIDCO chairman thar Lalthlengliana, MNF party-a hotute zinga mi chuan nimin khan ZID Chairman Office a luah ṭan. Office luah ṭannaah hian Supply minister K Lalrinliana, MLA Lalrinsanga leh MNF hotute zinga mi H Rammawi ten an ṭawiawm a ni.

Zoram Industrial Development Corporation Limited (ZIDCO) hi kum 1978-ah industry lam hmasawnna khawih tura din a ni a, enkawltu turin sorkarin chairman leh board of directors a ruat ṭhin a, Lungleiah branch pakhat a awm.

Thawktu mi 43 an awm mek a, chu'ng zinga pakuate chu group-A officer niin, managing director ni lai chu Lalramsanga Sailo, IRS a ni.

ZIDCO din tirh aṭang­in mi 4,961 hnenah loan cheng nuai 4575.85 an pe tawh a, loan latute aṭanga rulhna an hmuh tawh chu cheng nuai 6455.47 a ni. Loan latute'n an rulh ṭhat loh avangin ZIDCO hian loan bá NMDFC leh HUDCO-ahte a nei mek a ni.